Në kohën kur banorët e Rrjollit po protestojnë kundër projektit turistik në zonën e tyre, qeveria ka miratuar një tjetër leje ndërtimi për një kompani në pronësi të biznesmenit Bashkim Ulaj.
Dokumentet tregojnë se Këshilli Kombëtar i Territorit dhe Ujit ka miratuar me kusht ndërtimin e një kompleksi hotelerie dhe banimi në Jalë të Himarës.
Vendimi mban firmën e kryeministrit Edi Rama dhe datën 13 maj 2026, ndërsa lidhet me një procedurë miratimi të nisur gjatë vitit 2025.
Subjekti zhvillues i projektit është kompania “ABA Real Estate Management”, e regjistruar në vitin 2023 dhe në pronësi të Bashkim Ulajt.
Ulaj është gjithashtu pronari i kompanisë që po zhvillon resortin në Rrjoll të Velipojës, projekt që është kundërshtuar nga banorët dhe ka shkaktuar protesta e përplasje me policinë dhe rojet private.
Pavarësisht kundërshtimeve në Rrjoll, biznesmeni ka marrë miratimin për të zhvilluar një tjetër projekt turistik, këtë herë në një prej zonave më të kërkuara të bregdetit të Jonit.
Leja parashikon ndërtimin e një strukture hotelerie dhe banimi me lartësi nga një deri në pesë kate mbi tokë dhe një kat nëntokë.
Projekti do të ndërtohet në zonën kadastrale nr. 3844, në Jalë të Bashkisë Himarë.
Sipërfaqja e sheshit të ndërtimit është rreth 5 mijë metra katrorë, ndërsa prona ndodhet afro 300 metra larg plazhit në këmbë.
Sipas dokumenteve të projektit, zona vlerësohet se ka potencial të lartë për zhvillimin e objekteve të hotelerisë, banimit, tregtisë dhe shërbimeve.
Kompleksi do të quhet “Nereida” dhe do të përfshijë hotel, njësi banimi, bar-restorant, pishinë dhe ambiente të jashtme.
Në katin përdhe është planifikuar bar-restoranti, i lidhur drejtpërdrejt me pishinën dhe sistemimin e jashtëm.
Në katet e sipërme do të vendosen ambientet e hotelit, ndërsa në pjesën tjetër të godinës do të shpërndahen njësitë e banimit.
Miratimi është dhënë me kusht. Dokumenti përfundimtar i lejes mund t’i dorëzohet kompanisë vetëm pasi të plotësohet dokumentacioni tekniko-ligjor.
Shoqëria duhet gjithashtu të paguajë taksën e ndikimit në infrastrukturë në llogari të Bashkisë Himarë.
Në dokumentacion argumentohet se projekti respekton kontekstin e zonës dhe komunikon me mjedisin përreth.
Megjithatë, zhvillimi i një kompleksi deri në pesë kate mbi një kodër të gjelbër pranë plazhit pritet të rikthejë debatin mbi betonizimin dhe mënyrën se si po administrohen zonat më të lakmuara të bregdetit.
Leja e re vjen pikërisht kur qeveria përballet me akuza se po favorizon investitorët e mëdhenj, ndërsa kundërshtimet e banorëve për pronat dhe zhvillimet turistike mbeten pa zgjidhje. /gazetajone.com
