Fondi Shqiptar i Zhvillimit ka hapur një procedurë të re prokurimi me një fond limit prej 85 milionë lekësh, ose afërsisht 1 milion euro, këtë herë për blerjen e pajisjeve dhe sistemeve të teknologjisë së informacionit.
Objekti i procedurës është përcaktuar si “Blerje pajisje dhe sisteme të teknologjisë dhe informacionit për nevoja të FSHZH”.
Tenderi tërheq vëmendjen për shkak të vlerës së konsiderueshme të fondit të vendosur në dispozicion, ndërkohë që në listën e pajisjeve që parashikohet të blihen përfshihen kamera dixhitale, tastiera kompjuteri, ndërfaqe USB, monitorë, printerë laser dhe kompjuterë desktop.
Vetëm për këtë paketë pajisjesh teknologjike, institucioni i drejtuar nga Dritan Agolli ka parashikuar një fond limit prej 85 milionë lekësh.
Procedura vjen në një periudhë kur Fondi Shqiptar i Zhvillimit po zhvillon një numër të lartë prokurimesh me vlera të konsiderueshme, kryesisht për ndërhyrje infrastrukturore, mirëmbajtje rrugësh dhe projekte të tjera publike.
Ndryshe nga këto kontrata, tenderi i fundit nuk lidhet me ndërtimin apo rikonstruksionin e infrastrukturës, por drejtpërdrejt me furnizimin e institucionit me pajisje të teknologjisë së informacionit.
Vlera prej afro 1 milion eurosh ngre interes mbi specifikimet teknike, sasitë që do të prokurohen dhe mënyrën se si është përllogaritur fondi limit për secilën kategori pajisjesh.
Dokumentacioni i plotë i procedurës dhe ofertat e operatorëve ekonomikë do të tregojnë edhe koston konkrete të pajisjeve që Fondi Shqiptar i Zhvillimit synon të blejë.
