Nga mandat deputeti te një kullë 23 kate në zemër të Pogradecit.
Siç zbulon Korrieri, kompania “Molos”, në pronësi faktike të deputetit socialist Bledi Çomo dhe vëllait të tij, Genci Çomo, është subjekti ndërtues i projektit “Feneri i Pogradecit”, që ka marrë miratimin e Këshillit Kombëtar të Territorit në fund të korrikut.
Pas emrit “Feneri” qëndron një ndërtesë 23 kate, e cila ngre pikëpyetje të forta për ndërhyrjen në qytet dhe për ndërthurjen e pushtetit politik me interesat private të ndërtimit.
Përfaqësuesi i zgjedhësve pogradecarë shfaqet kështu edhe si pronar i kompanisë që do të ndërtojë kullën.
Rrugëtimi i Çomos në strukturat socialiste nisi në vitin 2004, në FRESSH. Më pas punoi si sekretar i deputetit Fatmir Xhafaj, ndërsa pas vitit 2013 mbajti detyrat e sekretarit të Këshillit të Qarkut Korçë dhe nënkryetarit të Bashkisë Pogradec. Vitin e kaluar mori mandatin e deputetit në qarkun e Korçës.
Siç mëson Korrieri, në shtator të vitit të kaluar, pas zgjedhjes si deputet, Çomo ia kaloi ushtrimin aktiv të të drejtave mbi kuotat e tij një personi të besuar, Kristi Kokoneshit.
Por ky ndryshim nuk e largoi nga pronësia e kompanisë “Molos”.
Pikërisht këtu qëndron thelbi i çështjes: administrimi nga një person tjetër nuk e zhduk interesin ekonomik të deputetit në kompaninë përfituese. Kalimi në zotërim pasiv nuk i jep vetvetiu përgjigje pyetjes nëse vendimmarrja publike krijon konflikt interesi.
Rasti kërkon transparencë për kushtet e miratimit të lejes, vlerësimin e ndikimit urbanistik dhe mënyrën se si është trajtuar lidhja e subjektit ndërtues me deputetin socialist.
Çfarë arsyetimi e justifikon një kullë 23 kate në zemër të Pogradecit dhe kujt i shërben ky zhvillim?
Pogradeci nuk është pronë e deputetit që e përfaqëson.
Një mandat politik është përgjegjësi ndaj qytetarëve, jo çek i bardhë për interesat e biznesit. Përpara se “Feneri” të ngrihet mbi qytet, institucionet dhe vetë Çomo u detyrohen pogradecarëve përgjigje publike./Korrieri
