Shqipëria ka regjistruar në gusht të vitit 2026 një rekord të ri historik në sasinë e importeve të produkteve të bulmetit, vezëve dhe mjaltit.
Të dhënat e tregtisë së jashtme tregojnë se gjatë muajit u importuan rreth 4.71 milionë kilogramë, ose afro 4,706 tonë produkte të këtij grupi. Kjo është sasia më e lartë mujore e regjistruar që prej fillimit të serisë statistikore në vitin 2005.
Rekordi i mëparshëm ishte shënuar në gusht 2024, me rreth 4.46 milionë kilogramë. Niveli i gushtit 2026 është rreth 249 mijë kilogramë, ose 5.6%, më i lartë. Edhe fatura e importeve ka qenë pranë niveleve rekord. Në gusht 2026, vlera e produkteve të importuara arriti në rreth 768 milionë lekë, duke u renditur si vlera e katërt më e lartë mujore e regjistruar në periudhën 2005-2026.
Më lart qëndrojnë vetëm korriku 2025, me 815.2 milionë lekë, korriku 2026 me 784 milionë lekë dhe gushti 2025 me 773.4 milionë lekë.
Veçanërisht interesante është krahasimi me një vit më parë. Në raport me gushtin 2025, sasia e importuar u rrit me rreth 7.9%, ndërsa vlera totale e importeve ra lehtë, me rreth 0.7%.
Kjo do të thotë se gjatë gushtit 2026 në Shqipëri hynë ndjeshëm më shumë produkte të këtij grupi, por me një faturë totale pak më të ulët se një vit më parë. Diferenca mund të lidhet me çmimet, llojin e produkteve të importuara apo origjinën e tyre.
Në strukturën e importeve sipas vendeve të origjinës, Italia dhe Hungaria mbajnë peshën kryesore. Më pas renditen Serbia, Bosnje Hercegovina dhe Maqedonia e Veriut. Vetëm këto pesë vende siguruan rreth 73% të gjithë sasisë së importuar gjatë muajit, duke treguar një përqendrim të fortë të furnizimit në pak tregje europiane dhe rajonale./Scantv.al
