Kryebashkiaku i arrestuar i Tiranës, Erion Veliaj ndodhet në paraburgim, por komunikimin e tij e vijon në mënyrë të koduar me anë të rrjeteve sociale.
Këtë herë sërish me një video në rrjetin e tij social të “preferuar”, TikTok ka dhënë një mesazh të koduar.
Teksa shkruan se momentalisht është i heshtur, kryebashkiaku paralajmëron se në momentin që do të flasë do të ketë breaking news (lajm i fundit).
“Je kaq i qetë. Modaliteti i heshtur është aktiv sepse nuk më pëlqen më. Kur te flas une ti do jesh lajm i fundit”, shkruan në Tiktok Veliaj, krahas pamjeve të tij nga evente të ndryshme.
Nuk dihet se për kë është ky mesazh apo me cilën çështje ka të bëjë informacioni, i cili Veliaj pretendon se do të mbulojë faqet e mediave, deri në momentin që do të flasë.
Kjo nuk është hera e parë që kryebashkiaku përcjell mesazhe nëpërmjet Tik Tok, ku shpeshherë me anë të trendeve zgjedh të flasë për gjendjen e tij në qeli, apo t’iu përgjigjet hetimeve dhe dhënë mesazhe të koduara.
