Ilaçet për humbje peshe mund të përgjysmojnë rrezikun e pacientëve me zemër për t’u shtruar në spital ose për të vdekur para kohe, sipas studimit më të madh të këtij lloji.
Klasa e barnave të njohura si agonistë GLP-1 rezultoi të ofrojë “përfitime dramatike” për pacientët kardiakë, duke ulur ndjeshëm rrezikun e tyre për t’u sëmurë rëndë ose për të vdekur parakohe nga çdo shkak.
Zbulimi, i prezantuar në konferencën më të madhe botërore të kardiologjisë në Madrid, nënkupton se këto ilaçe mund t’u jepen miliona pacientëve me probleme në zemër për t’i ndihmuar të qëndrojnë larg spitalit dhe të jetojnë më gjatë.
Barnat për humbje peshe imitojnë hormonin glukagon-like peptide (GLP-1), i cili krijon ndjesinë e ngopjes, dhe fillimisht u zhvilluan për trajtimin e diabetit. Në vitet e fundit ka dalë gjithnjë e më shumë në pah se këto barna mund të shpëtojnë jetë edhe përtej trajtimit të obezitetit. Tani, rezultatet e një studimi të ri të prezantuar në Kongresin Vjetor të Shoqatës Evropiane të Kardiologjisë tregojnë se barnat për humbje peshe mund ta ulin deri në 58% rrezikun që personat me sëmundje të zemrës të shtrohen në spital ose të vdesin para kohe.
Në këtë studim, studiues amerikanë nga Mass General Brigham – një rrjet jofitimprurës spitalesh dhe mjekësh me qendër në Boston – analizuan të dhënat reale të mbi 90 mijë pacientëve me dështim të zemrës, obezitet dhe diabet të tipit 2. Të gjithë vuajnë nga dështimi i zemrës me fraksion ejeksioni të ruajtur (HFpEF), forma më e zakonshme e kësaj gjendjeje.
Rezultatet treguan se pacientët që merrnin semaglutide kishin 42% më pak gjasa të përfundonin në spital ose të vdisnin para kohe krahasuar me grupin e kontrollit. Ndërkohë, tirzepatide uli me 58% rrezikun e shtrimit në spital për dështim zemre ose vdekjes nga çdo shkak.
Në nivel global, mbi 60 milionë persona vuajnë nga dështimi i zemrës. Studimet e mëparshme kishin sugjeruar se ilaçet për humbje peshe mund të përmirësojnë simptomat, por deri më tani nuk kishte pasur prova të forta për ndikimin e tyre në shtrimet spitalore apo mbijetesën.
Rezultatet e prezantuara në Madrid u publikuan njëkohësisht edhe në revistën JAMA të Shoqatës Mjekësore Amerikane.
Autori i studimit, Dr. Nils Krüger nga spitali Brigham and Women’s, tha:
“Pavarësisht barrës së lartë të sëmundshmërisë dhe vdekshmërisë nga HFpEF, opsionet aktuale të trajtimit janë të kufizuara. Semaglutide dhe tirzepatide njihen për efektet e tyre në rënien nga pesha dhe kontrollin e sheqerit në gjak, por studimi ynë sugjeron se ato mund të sjellin përfitime të mëdha edhe për pacientët me obezitet dhe diabet të tipit 2 duke ulur pasojat negative të dështimit të zemrës.”
Ai shtoi: “Gjetjet tona tregojnë se në të ardhmen, medikamentet që synojnë GLP-1 mund të ofrojnë një opsion të shumë-nevojshëm trajtimi për pacientët me dështim të zemrës.”
Këto gjetje i shtohen provave që barnat për humbje peshe mund të ndihmojnë në parandalimin ose trajtimin e sëmundjeve të zemrës. Në maj, një tjetër studim tregoi se njerëzit që merrnin semaglutide kishin 20% më pak rrezik për infarkt, goditje në tru ose vdekje nga sëmundjet kardiovaskulare.
Studimi i Universitetit College London gjithashtu tregoi se semaglutide sjell përfitime kardiovaskulare pavarësisht peshës fillestare ose sasisë së kilogramëve të humbur.
Dr. Carlos Aguiar, nënkryetar i Shoqatës Evropiane të Kardiologjisë, i cili nuk ishte pjesë e studimit, e mirëpriti këtë zbulim:
“Kjo tregon se ka përfitime nga përdorimi i semaglutide ose tirzepatide për të ulur rrezikun e shtrimit në spital për dështim zemre ose vdekjes nga çdo shkak. Ne mendonim se mund të mos gjendnim një trajtim efikas për një pjesë të madhe të këtyre pacientëve, dhe surpriza e mirë është që këto barna, të cilat veprojnë përmes rënies në peshë, por ndoshta edhe përtej këtij mekanizmi, mund të reduktojnë ndjeshëm rrezikun.”
Megjithatë, ai theksoi se duhen prova të mëtejshme para se mjekët të rekomandojnë përdorimin e gjerë të këtyre ilaçeve posaçërisht për pacientët kardiakë, por i cilësoi rezultatet si “lajm i mirë”.
Edhe Dr. Sonya Babu-Narayan, kardiologe dhe drejtoreshë klinike e Fondacionit Britanik të Zemrës, u shpreh:
“Këto të dhëna i shtohen provave në rritje që mbështesin përdorimin e barnave për humbje peshe tek pacientët që vuajnë nga dështimi i zemrës dhe obeziteti, për të reduktuar shtrimet spitalore dhe vdekjet. Është thelbësore që pacientët e përshtatshëm me dështim zemre të kenë mundësinë të konsiderohen për këto terapi, krahas barnave të tjera të bazuara në prova.”
