Vdekja misterioze e biznesmenit italian në Tepelenë, skenarët e hetimit dhe dëshmitë kontradiktore
TEPELENË – Vdekja e sipërmarrësit italian Edoardo Sarchi në fshatin Salari të Tepelenës vijon të mbetet një enigmë për autoritetet shqiptare dhe italiane. 44-vjeçari nga Varese, drejtues i kompanisë “Tegola Edilcentro” të specializuar në prodhimin dhe eksportin e materialeve të ndërtimit, u gjet i vrarë mesnatën e së premtes gjatë një udhëtimi për gjueti.
Skemat e mundshme: aksident, konflikt apo ekzekutim
Gazeta italiane Corriere della Sera raporton se hetuesit po shqyrtojnë disa pista: një aksident gjatë gjuetisë, një përplasje që degjeneroi në dhunë, apo edhe një ekzekutim i paramenduar. Kjo pasi provat e mbledhura në terren dhe dëshmitë e marra deri tani mbeten kontradiktore.
Gjurmë gjaku u gjetën mbi një automjet dhe në asfalt, por jo brenda makinës, duke ngritur dyshime se Sarchi mund të jetë nxjerrë jashtë dhe qëlluar. Një tjetër element është edhe shfryrja e gomave të Land Rover-it me të cilin lëvizte grupi, pa u sqaruar nëse kjo ndodhi aksidentalisht apo qëllimisht.
Konflikti për dritat e makinës
Sipas burimeve të ABC News, ngjarja mund të ketë nisur nga një debat banal për dritat e automjeteve. Autori i dyshuar, ende në kërkim nga policia, dyshohet se u acarua nga dritat e makinës ku ndodhej Sarchi. Grindja verbale degradoi në përplasje fizike e më pas në përdorimin e armëve. Një plumb goditi biznesmenin në këmbë, duke i dëmtuar arterien kryesore dhe duke shkaktuar hemorragji fatale.
Gjurmët në vendngjarje tregojnë se ka pasur shkëmbim zjarri, duke ngritur dyshime se edhe pala e viktimës ishte e armatosur.
Dëshmitë kontradiktore të familjes Braçi
Sarchi atë natë shoqërohej nga Eqerem Braçi dhe djemtë e tij, Gazmend e Daniel, me të cilët kishte lidhje biznesi. Pas një darke në shtëpinë e tyre, ata dolën për gjueti me dy makina – një Volkswagen dhe një Land Rover Defender. Pikërisht gjatë këtij udhëtimi ndodhi tragjedia.
Por dëshmitë e tyre para hetuesve kanë qenë kontradiktore. Fillimisht ata deklaruan se grupi u sulmua nga persona të panjohur, ndërsa më vonë kanë thënë se italianin e gjetën të qëlluar dhe se ai vdiq në duart e tyre. Edhe një bari i zonës, Armir Hitoveizi, ka dhënë dëshmi se dëgjoi të shtëna dhe pa një person të armatosur në vendngjarje, duke përforcuar variantin e “sulmit misterioz”.
Hetimet në terren
Policia dhe Prokuroria e Gjirokastrës kanë rihapur vendin e ngjarjes për eksperimente hetimore. Janë sekuestruar dy armë gjahu, të cilat po ekzaminohen për të verifikuar nëse është qëlluar me to. Po ashtu, janë marrë si prova edhe dy automjetet e përfshira. Gjurmët e gjakut të gjetura pranë Land Rover-it sugjerojnë se trupi i italianit mund të jetë zhvendosur.
Autori i dyshuar është identifikuar, ndërsa dy persona të tjerë janë shpallur në kërkim pasi dyshohet se kanë dijeni mbi ngjarjen.
Lidhjet e viktimës me Shqipërinë dhe profili familjar
Edoardo Sarchi ishte i martuar dhe i njohur për pasionin e tij për gjuetinë. Ai kishte lidhje të forta biznesi me Shqipërinë përmes kompanisë Edilcentro, e themeluar nga xhaxhai i tij, Augusto Nidoli. Babai i tij, Vittorio Sarchi, ishte një figurë politike e njohur në Varese deri në ndarjen nga jeta në vitin 2022.
Kushëriri i tij, Riccardo Barbieri, pronar i një B&B në zonë, deklaroi për mediat italiane: “Edoardo ishte një njeri i përkushtuar në punë dhe shumë i dashur. Për këtë më foli edhe herën e fundit që u pamë, në funeralin e të atit.”
Ambasada italiane në Tiranë po ndjek nga afër zhvillimet dhe ka vënë në dijeni familjarët e viktimës në Itali.
Misteri vazhdon
Ngjarja e ndodhur në orët e para të mëngjesit në një zonë malore pa kamera sigurie e bën hetimin edhe më të vështirë. Pista e aksidentit gjatë gjuetisë, ajo e një konflikti të çastit dhe skenari i një atentati të paramenduar mbeten të hapura.
Për momentin, vrasja e biznesmenit italian Edoardo Sarchi mbetet një mister i pazgjidhur, duke tronditur si opinionin publik shqiptar, ashtu edhe atë italian. /korrieri
