Në skenën politike shqiptare po shfaqet një zhvillim i pazakontë: Partia Demokratike po i del në mbrojtje Erion Veliajt, pikërisht në momentin kur pritet që shkarkimi i tij si kryebashkiak i Tiranës të formalizohet pas vendimit për shpalljen e zgjedhjeve të reja lokale në kryeqytet.
Ky përmbysje qëndrimesh ka ndezur debat të fortë, pasi vetëm pak muaj më parë PD kërkonte me ngulm largimin e Veliajt, duke e akuzuar për abuzime dhe për leje ndërtimi të dyshimta, dosjen e SPAK, inceneratorin e Tiranës, etj., madje në disa protesta pati edhe përplasje të dhunshme me policinë bashkiake.
Tashmë, PD ka dalë hapur kundër Ramës, Gjykatës Kushtetuese dhe Presidentit, duke argumentuar se procesi për shpalljen e zgjedhjeve është antikushtetues.
Në fakt, qëndrimi i opozitës duket qartazi një mbrojtje indirekte ndaj vetë Veliajt, që ka arritur të organizojë një “front të përbashkët” politik për të frenuar vendimin e qeverisë.
Në zemër të kryeqytetit po ngrihet një kompleks që përfshin ndërtime luksoze të lidhura me emra të njohur të biznesit, mes tyre Ilir Shtufi dhe grupi i ashtuquajtur “biznesmenët e Zenit”.
Pikërisht ky rrjet ekonomik dhe politik po shihet si arsyeja kryesore pse Veliaj ka arritur të përfitojë mbështetje të papritur nga opozita.
Nëse deri dje Gazment Bardhi e quante “babin e Zenit” si simbol të korrupsionit në Tiranë, sot ai ndodhet, politikisht, në të njëjtin krah me të, në një bashkim të pazakontë për të mbrojtur kryebashkiakun që firmosi lejet e kullave për biznesmenët e Zenit.
Tensionet pritet të rriten ndërsa qeveria përgatitet për shpalljen e datës së zgjedhjeve të pjesshme në Tiranë, në një klimë ku aleancat e reja po shfaqin fytyrën e tyre të vërtetë , atë të interesit të përbashkët, përtej politikës dhe parimeve. /korrieri
