Arlinda Pogaj, drejtoresha e Operatorit të Blerjeve të Përqendruara (OBP), po shndërrohet në një nga emrat më të fuqishëm në administratën publike përsa i përket vlerës së tenderëve që kalojnë nëpër duart e saj. Pas sektorëve të ndërtimit, pastrimit dhe ushqimeve, tashmë OBP nën drejtimin e saj i është futur edhe “biznesit” të medikamenteve dhe oksigjenit mjekësor.
Operatori ka hapur ditët e fundit shtatë tenderë me objekt “blerje oksigjen mjekësor” për spitalet rajonale dhe qendrat spitalore të vendit, me një vlerë totale 121 milionë lekë, ose mbi 1.2 milionë euro.
Në listë përfshihen:
-
Spitali i Beratit – 160 mijë euro
-
Spitali Rajonal i Gjirokastrës – 110 mijë euro
-
Qendra Spitalore Rajonale Fier – 155 mijë euro
-
Spitali Rajonal i Lezhës – 133 mijë euro
-
Spitali Rajonal i Durrësit – 336 mijë euro
-
Spitali “Shefqet Ndroqi” në Tiranë – 300 mijë euro
Tenderët e oksigjenit kanë qenë ndër më të dyshimtët ndër vite, me kontrata që kalojnë dorë më dorë. Nga spitalet, procedurat kaluan fillimisht në Ministrinë e Shëndetësisë gjatë drejtimit të Ilir Beqjas dhe më pas të Ogerta Manastirliut, ndërsa tani janë përqendruar te OBP, që ka marrë rolin e vetëm për prokurimet kombëtare në sektorin publik.
Burime nga hetimet konfirmojnë se në Prokurorinë e Posaçme (SPAK) ndodhet një dosje hetimore mbi tenderët e oksigjenit, ku disa zyrtarë publikë dhe pronarë kompanish janë nën hetim. Prokurorët kanë sekuestruar dokumentacionin dhe celularët e personave të përfshirë.
Dyshimet kryesore lidhen me firmat GTS dhe MESSER, të cilat kanë fituar pothuajse të gjitha kontratat për furnizimin e oksigjenit spitalor gjatë viteve të fundit. Hetuesit po verifikojnë mundësinë e një marrëveshjeje të fshehtë mes dy kompanive, pasi në çdo tender merr pjesë vetëm njëra prej tyre, duke eliminuar konkurrencën dhe duke siguruar ndarjen e tregut.
Nëse kjo praktikë përsëritet edhe me tenderët e rinj, Arlinda Pogaj përballet me një provë të vërtetë zjarri. Ajo mund të ndjekë të njëjtën linjë si paraardhësit, ose të ndërhyjë për të ndaluar skemën e tenderëve të paracaktuar.
Burime pranë OBP konfirmojnë se tenderët janë në fazë vlerësimi, ndërsa zyrtarë të SPAK kanë nisur verifikime në disa spitale për të parë lidhjet mes fituesve dhe depozitave ekzistuese të oksigjenit. Në rastet ku një spital ka depozitë të firmës GTS, tenderin e fiton GTS; ndërsa ku depozita është e MESSER-it, fituese shpallet kjo e fundit.
Nëse kjo praktikë konfirmohet, Arlinda Pogaj dhe OBP do të jenë në qendër të një tjetër skandali që përfshin abuzime me fondet publike në sektorin e shëndetësisë.
