Një sipërfaqe e stërmadhe prej 143 mijë metrash katrorë, buzë detit Jon, është zaptuar nga privatët. Me vendime të befta dhe tepër të dyshimta, sipërfaqja e pronës, që rrethon Marinën e Orikumit, do të shndërrohet në një masiv të stërmadh betoni.
Sipas projektit që është publikuar, në të gjithë zonën, do të ndërtohen plot 22 ndërtesa deri në 15 kate, të cilat do të “rrethojnë” atë pak sipërfaqe ujore që është aktualisht dhe që përdoret për varka dhe jahte. E ndërtuar si një domosdoshmëri për anijet e vogla, Marina administrohej deri pak vite më parë nga një firmë italiane.
Në zonë u ndërtuan dy godina nga 3 kate secila, pjesë e administratës së Marinës. Por duke parë simotrat e porteve në Shqipëri, kryesisht Portin e Durrësit apo edhe vetë Portin e Vlorës, ku po ndërtohen resorte, hotele, restorante, bare etj, edhe Marina e Orikumit do të ketë të njëjtin fat.
Por, ndryshe nga dy të parat, historia e kësaj Marine është tepër e dyshimtë, pasi me vendime “nën rrogoz” apo me influenca, pronarët e rinj ia kanë dalë mbanë që të marrin leje nga Këshilli Kombëtar i Territorit dhe Ujit për të ngritur në atë vend plot 22 ndërtesa.
Leja ende nuk është zbardhur nga KKTU-ja, por kjo s’e ka penguar firmën “Marina Orikum”, ku vëllezërit Dulaku kanë 51 % të aksioneve dhe 49 % i ka Fatjon Veizaj, ish-deputet i Partisë Demokratike, të reklamojnë në internet të gjithë projektin.
E gjithë zona ka një sipërfaqe të stërmadhe, prej 143 mijë metrash katrorë, teksa nga ajo që shihet në fotot, duket se ndërtimet do të jenë edhe në breg të detit, një pronë ekskluzive shtetërore. Ligji e përcakton qartë se sipërfaqja ujore apo edhe bregu i detit janë shtetërore dhe nuk mund të tjetërsohen, por ligji është vetëm një copë letër.
Por, si qëndron e vërteta e Marinës së Orikumit?!
VoxNews ka hulumtuar dhjetëra dokumente zyrtare, bankare, noteriale apo administrative, që hedhin dritë mbi transaksionet tepër të dyshimta për të zaptuar një pronë ekskluzive, që dikur është dhënë në përdorim (me koncesion) një firme italiane.
Sipas dokumentit, shitësi është pronar i një kuote pjesëmarrjeje të barabartë me 100% të kapitalit themeltar të shoqërisë tregtare “Giorgi Alfo” sh.p.k., me seli në Vlorë, në adresën Porti i Jahteve, Orikum. “Çmimi total për shitjen e kuotës është 400.210 euro, shumë e cila do të paguhet nga blerësi në momentin e nënshkrimit të kësaj kontrate” thuhet në dokumente.
Në këtë mënyrë, një pronë e stërmadhe u mor në administrim nga një familje që vitet e fundit janë njohur për ndërtime të shumta në bregdet. Madje, në muajin tetor 2025 u raportuar se SPAK-u kreu kontrolle në banesën e Artan Dulakut, në lidhje me fitimin e koncesionit të portit të Limionit në Sarandë, dikur një bazë ushtarake.
Por, larg zhurmës së Sarandës apo edhe të lejeve të tjera në mbarë Shqipërinë, vëllezërit Dulaku papritur u bënë pronar të një prone tepër të lakmueshme, buzë detit Jon. Dhe këtu filloi edhe ambicia e tyre për të ndërtuar dhe tjetërsuar të gjithë zonën.
Sipas dokumenteve, firma Concord pasi shtiu në dorë Marinën, mori një kredi te Banka Amerikane e Investimeve (ABI BANK), një bankë e cila njihet për pronarët e saj që veprojnë në parajsa fiskale. Shuma që vëllezërit Dulaku morën kredi është plot 3 milionë euro.
Koha kaloi dhe vijmë në janar 2023. Megjithëse s’ka lidhje të drejtpërdrejta me firmën, apo menaxhimin e Marinës, një lajm bëri bujë në atë muaj. Deputeti i Partisë Demokratike, Fatjon Veizaj, dha dorëheqjen nga mandati. Një veprim që, nëse do të shohim letrat, duhet të ketë lidhje pikërisht me pronën gjigande.
Sipas dokumenteve që ka hulumtuar VoxNews, në datën 22 qershor 2023, është bërë një tjetër kontratë shitje kuotash. Pala shitëse në këtë rast është Concord Investment, e cila i shet aksionet firmës RDA.
Në këtë kohë, Fatjon Veizaj ishte “në hije” në këtë firmë, duke vendosur si administrator dhe pronar me letra dy miq të tij. Në dokument përcaktohet se çmimi i shitjes nga Dulakët te Veizaj të 49% të kuotave, u bë për 196.103 euro.
Firma RDA ka vijuar me procedurat dhe pasi mori 49 % të aksioneve, mori një kredi në bankë, duke vendosur si kolateral pikërisht kuotat. Një vendim në mbrojtje, pasi megjithëse s’ka mazhorancën, RDA-ja mbrohet pikërisht nga banka, e cila nëse s’paguan këstet apo detyrimet, mund të shesë asetet që zotëron Marina Orikum.
Sërish larg syve kureshtarë, tashmë me dy ortakë të fuqishëm, majtas dhe djathtas, Dulakët dhe Veizaj vijuan veprimet, duke synuar që në gjithë atë sipërfaqe të bënin ndërtime shumëkatëshe.
Sipas dokumentit më sipër, i cili është rendi i ditës i mbledhjes së Këshillit Kombëtar të Territorit dhe Ujit në datën 24 dhjetor 2024, në pikën 12 është edhe një leje zhvillimi në Orikum.
“Leje zhvillimi për objektin ‘Orikum Marina Resort, Hotel dhe Struktura akomoduese rezidenciale’, me vendndodhje në Orikum, Bashkia Vlorë, me subjekt zhvillues shoqërinë ‘Marina Orikum’ sh.p.k” thuhet në dokument.
Deri më sot, leja nuk është zbardhur nga KKTU-ja, por lejen e kanë “zbardhur” pronarët e saj. Dulakët dhe Veizaj kanë filluar që t’a reklamojnë projektin.
Gjatë hulumtimeve që ka kryer VoxNews, firma shkruan se në zonën në fjalë do të ndërtohen plot 22 godina, deri në 15 kate. Do të ketë vila, restorante, hotele e shumë apartamente. Por ajo që bie në sy është se ndërtimet do të shtrihen në një sipërfaqe prej 143 mijë m2 buzë detit Jon.
Asnjë institucion shtetëror nuk ka dhënë informacion për tjetërsimin e kësaj marine; Kush është pronari i truallit? Çfarë kishte nën administrim firma italiane? Si u zgjerua projekti në 143 mijë m2? A nuk është pronë shtetërore uji dhe bregu i detit? A duhej të ishte rishtetëzuar Marina e Orikumit? /voxnews
