Një zjarr vdekjeprurës shkatërroi një kompleks masiv banesash në Hong Kong, duke vrarë të paktën 55 persona ndërsa 300 të tjerë rezultojnë ende të zhdukur.
Sipas policisë zjarri mund të jetë shkaktuar nga një firmë ndërtimi “tepër neglizhente” që përdor materiale të pasigurta, raporton Reuters. Tre persona janë vënë në pranga: dy drejtorë dhe një konsulent i një kompanie ndërtimi.
Kompleksi i mbushur plot e përplot me njerëz në lagjen veriore Tai Po ka 2,000 apartamente në tetë blloqe që janë shtëpi për më shumë se 4,600 njerëz, në një qytet që përballet me mungesa kronike të strehimit të përballueshëm.
Apartamentet u ndërtuan në fillim të viteve 1980 dhe ishin në proces rinovimi për gati një vit. Në të gjithë kompleksin ishin vendosur skela bambuje dhe rrjeta sigurie – një teknikë ndërtimi e përhapur kudo në Hong Kong. Policia tha se përveç ndërtesave që ishin të mbuluara me fletë rrjete mbrojtëse dhe plastikë që mund të mos përmbushin standardet e zjarrit, ata zbuluan se disa dritare në një ndërtesë të paprekur ishin të vulosura me një material shkumë, të instaluar nga një kompani ndërtimi që kryente punime mirëmbajtjeje gjatë një viti.
Numri i të vdekurve është tani më i larti në një zjarr në Hong Kong që nga viti 1948, kur 176 persona u vranë në një zjarr në një depo.
