Një dokument i brendshëm i Kontrollit të Lartë të Shtetit (KLSH) ka ngjallur interes dhe reagim në qarqet profesionale pasi, sipas burimeve, audituesit dhe ish-auditues të institucionit i kanë drejtuar çështjen deri në institucionet ndërkombëtare.
Materiali, i datës 30 tetor 2025, është dorëzuar jo vetëm tek Presidenti i Republikës, Kuvendi dhe komisionet parlamentare, por edhe tek Delegacioni i Bashkimit Europian në Shqipëri, si dhe organizata si SIGMA dhe NDI — një lëvizje që analistët e konsiderojnë jashtëzakonisht serioze dhe jo rutinë.
Burimet pranë fushës së administrimit publik thonë se përfshirja e BE-së dhe strukturave ndërkombëtare tregon se çështja ka natyrë institucionale dhe mund të lidhet me shqetësime për standarde të qeverisjes, transparencës apo funksionimit të strukturave të auditimit shtetëror.
Vetë dokumenti përmban formulime si “material mbështetës mbi problematikat e ngritura”, duke lënë të kuptohet se ekziston një ankesa kryesore e cila i ka shqetësuar seriozisht vetë auditorët e brendshëm.
Megjithatë, deri më tani nuk ka asnjë reagim zyrtar nga KLSH apo nga institucionet e adresuara, dhe përmbajtja e plotë e ankesës nuk është bërë publike.
Ekspertë të qeverisjes institucionale shprehen se ky lloj zhvillimi nuk është i zakonshëm dhe se mund të pasqyrojë tensione të brendshme ose mosmarrëveshje në mënyrën se si funksionon auditimi më i lartë shtetëror./Maska.al/
