Shteti u vendos në lëvizje një javë pas ngjarjes, vetëm pasi u bë publike. Ministria e Drejtësisë njofton se dje u bë akti i ekspertimit të fëmijës 3-vjeç që theu këmbën në rrethana ende të pasqaruara në një kopsht privat. Dosja më pas iu dërgua prokurorisë.
“Në lidhje me ngjarjen e fëmijës 3 vjeçe që është dëmtuar në një kopsht privat ju bëj me dije se, vendimi për kryerjen e ekspertimit për fëmijën e sipërpërmendur ka ardhur në 07.11.2023, në IML (rreth ores 13.30) dhe menjëherë kemi ndërmarrë veprimet për kryerjen e aktin të ekspertimit.
Dje, në datë 08.11.2023, akti i ekspertimit i fëmijës u krye dhe u nis po dje, për në Prokurorinë e Rrethit Gjyqësor Tiranë” njofton ministria e Drejtësisë. Por në fakt ngjarja ndodhi në datë 1 Nëntor dhe një javë ngeli në heshtje në tentativë për t’u mbyllur. Në hetim deri tani është edukatorja Majlinda Dehima dhe pronari i kopshtit që nuk kishte licencë.
