Sipas të dhënave të Bankës së Shqipërisë, kredia për individët vijoi rritjen në tremujorin e parë të vitit 2026. Në fund të kësaj periudhe, totali i huave për individët arriti në 381.1 miliardë lekë, nga 322.6 miliardë lekë në tremujorin e parë të vitit 2025, duke shënuar një rritje vjetore prej 18.1%.
Pjesa më e madhe e kredisë për individët është e përqendruar në Tiranë. Në kryeqytet, stoku i huasë arriti në 257.4 miliardë lekë, nga 217.5 miliardë lekë një vit më parë, me rritje 18.3%. Kjo do të thotë se Tirana mban rreth 67.5% të totalit të kredisë për individët në vend.
Pas Tiranës, niveli më i lartë i huasë për individët regjistrohet në Durrës, me 25.6 miliardë lekë, ndjekur nga Vlora me 10.8 miliardë lekë, Fieri me 10.3 miliardë lekë dhe Elbasani me 10.1 miliardë lekë.
Në terma rritjeje, ecurinë më të fortë e ka shënuar Elbasani. Kredia për individët në këtë qark u rrit me 22%, duke arritur në 10.1 miliardë lekë, nga 8.27 miliardë lekë një vit më parë. Pas tij renditen Durrësi me rritje 18.7%, Korça dhe qarqet e tjera me nga 18.6%, si dhe Tirana me 18.3%.
Një pjesë e rëndësishme e huasë për individët lidhet me blerjen e banesave. Në Tiranë, kredia për banesa arriti në 186.4 miliardë lekë, nga 159.9 miliardë lekë në tremujorin e parë të vitit të kaluar, me rritje 16.6%. Edhe në këtë kategori, kryeqyteti dominon qartë, duke mbajtur pjesën dërrmuese të financimit për pasuri të paluajtshme.
Kredia për blerje banesash është rritur edhe në shumicën e qarqeve të tjera. Në Durrës ajo arriti në 15 miliardë lekë, me rritje 11.4%, ndërsa në Korçë u rrit me 10.3% dhe në Elbasan me 10.1%. Rritje më të moderuar shënuan Fieri me 8.9%, Vlora me 5.2% dhe Shkodra me 3.2%.
Lezha është i vetmi qark ku kredia për blerje banesash rezulton në rënie të lehtë. Në fund të tremujorit të parë 2026, kjo kategori zbriti në 3.33 miliardë lekë, nga 3.34 miliardë lekë një vit më parë, me një tkurrje minimale prej 0.1%.
Në tërësi, të dhënat tregojnë se kredia për individët vijon të zgjerohet me ritme të larta, ndërsa tregu mbetet shumë i përqendruar në Tiranë. Kredia për banesa mbetet segmenti kryesor i huamarrjes së individëve, por rritja nuk është e njëtrajtshme në të gjitha qarqet./Scan
