Një aksident i rëndë është regjistruar ditën e sotme në autostradën Tiranë-Durrës, ku një autobus me pasagjerë është përmbysur në rrugë.
Mjeti ishte nisur nga Berati drejt Tiranës, kur drejtuesi dyshohet se ka humbur kontrollin.
Si pasojë e aksidentit, shoferi i autobusit ka humbur jetën, ndërsa 12 pasagjerë kanë mbetur të plagosur.
Të lënduarit janë transportuar drejt Spitalit të Traumës, ku po marrin ndihmë mjekësore.
Sipas të dhënave paraprake, 7 prej pasagjerëve ndodhen në gjendje të rëndë shëndetësore.
Mes tyre është edhe një fëmijë, i cili raportohet se është intubuar.
Nga hetimet e para dyshohet se drejtuesi i mjetit mund të ketë pësuar atak kardiak gjatë drejtimit të autobusit.
Pas humbjes së kontrollit, mjeti është përplasur me bordurën anësore dhe më pas është përmbysur në rrugë.
Sipas të dhënave nga vendngjarja, një prej bordurave metalike ka kaluar mes përmes autobusit, duke rënduar pasojat e aksidentit.
Policia nuk përjashton as mundësinë që mjeti të ketë pasur probleme teknike.
Fillimisht u raportua për dy viktima, por sipas të dhënave të konfirmuara deri tani, viktimë e aksidentit ka mbetur vetëm drejtuesi i autobusit.
Grupi hetimor po vijon verifikimet për të përcaktuar shkaqet e plota të aksidentit dhe nëse ngjarja ka ardhur nga gjendja shëndetësore e shoferit, defekt teknik apo faktorë të tjerë.
