Behgjet Pacolli ka reaguar sërish pasi kompania “MABCO Constructions” mori zyrtarisht shkresën e Ministrisë së Infrastrukturës dhe Energjisë për nisjen e procedurës së zgjidhjes së kontratës koncesionare të Aeroportit Ndërkombëtar të Vlorës.
Përmes një deklarate publike, Pacolli bëri të ditur se kompania do ta dërgojë çështjen në arbitrazh ndërkombëtar, duke e konsideruar këtë si rrugën e vetme të mbetur për mbrojtjen e të drejtave të saj.
Sipas tij, MABCO kishte zgjedhur për më shumë se një vit dialogun institucional dhe ishte përpjekur të shmangte një konflikt juridik ndërkombëtar me shtetin shqiptar.
Pacolli pretendon se gjatë kësaj periudhe kompania është përballur me tentativa për tjetërsimin e kuotave, vendime gjyqësore kontradiktore dhe përjashtimin nga administrimi i investimit.
Ai deklaroi gjithashtu se MABCO-s i është bllokuar fizikisht hyrja në kantier, ndërsa institucionet shtetërore nuk kanë ndërhyrë për rivendosjen e aksesit dhe vijimin e punimeve.
Sipas Pacollit, pengesat janë krijuar në momentin kur aeroporti ndodhej në fazën përfundimtare dhe pranë procesit të certifikimit.
Ai kundërshton argumentet e paraqitura nga Ministria e Infrastrukturës, duke pretenduar se vonesat që po përdoren për zgjidhjen e kontratës janë pasojë e bllokimit të punimeve.
Pacolli tha se shkresa e ministrisë përmban pretendime që, sipas vlerësimit të kompanisë, nuk përputhen me dokumentacionin dhe gjendjen faktike të projektit.
MABCO pretendon se që prej gushtit 2025 i ka kërkuar ministrisë autorizimin e një auditimi të pavarur ndërkombëtar teknik dhe financiar për investimet e kryera në aeroport.
Sipas deklaratës, kërkesat për auditim janë refuzuar ose kanë mbetur pa përgjigje.
Pacolli ngriti gjithashtu pretendimin se kallëzimet penale të paraqitura nga kompania për veprime të dyshuara të kundërligjshme nuk janë trajtuar nga institucionet kompetente.
Ai argumenton se nisja e procedurës për zgjidhjen e koncesionit bie ndesh me vendimin e Gjykatës së Lartë, kontratën koncesionare dhe marrëveshjen mes Shqipërisë dhe Zvicrës për mbrojtjen e investimeve.
“Unë nuk kam dëshiruar kurrë që taksapaguesit shqiptarë të paguajnë pasojat e veprimeve ose mosveprimeve të disa zyrtarëve”, shkroi Pacolli.
Ai shtoi se në arbitrazh MABCO do të paraqesë të gjitha faktet, provat dhe dokumentacionin që disponon për realizimin e investimit dhe pengesat e pretenduara.
“Nuk kam dyshim se ky proces do të nxjerrë në dritë të vërtetën”, deklaroi Pacolli, duke e cilësuar arbitrazhin si pasojë të veprimeve dhe mosveprimeve të institucioneve shqiptare.
