Shqipëria renditet mes vendeve me çmimin më të lartë të naftës në botë, pavarësisht se të ardhurat e qytetarëve mbeten shumë më të ulëta se në ekonomitë me të cilat krahasohet.
Sipas të dhënave të GlobalPetrolPrices për 7 shtatorin 2026, një litër naftë në Shqipëri kushtonte mesatarisht 2,760 dollarë.
Me këtë nivel, Shqipëria renditej e teta në botë, krah vendeve shumë më të pasura si Zvicra, Singapori, Holanda dhe Gjermania.
Ndërkohë, paga mesatare në vend, sipas INSTAT-it, ishte 92,150 lekë në muaj, ose rreth 1,000 euro bruto dhe 880 euro neto.
GlobalPetrolPrices përllogarit se çmimi mesatar i naftës në të gjithë botën është 1,62 dollarë për litër, rreth 70% më i ulët se në Shqipëri.
Edhe pse vendet blejnë karburantet me çmime të përafërta në tregjet ndërkombëtare, diferencën kryesore në çmimin përfundimtar e krijojnë taksat e vendosura nga qeveritë.
Në Evropë, Turqia kishte çmimin më të ulët, me 1,834 dollarë për litër, ndërsa në Moldavi dhe Poloni nafta shitej nën 2 dollarë.
Në Greqi, çmimi mesatar ishte 2,387 dollarë për litër, dukshëm më i ulët se në Shqipëri.
Nafta më e lirë në botë shitej në Venezuelë dhe Iran, përkatësisht me vetëm 0,004 dhe 0,006 dollarë për litër.
Hong-Kongu kryesonte listën e vendeve me naftën më të shtrenjtë, me afro 4,7 dollarë për litër.
Pas tij renditeshin Malavi me 3,375 dollarë, Danimarka me 3,026 dollarë dhe Norvegjia me 2,974 dollarë për litër.
Zvicra, Lihtenshtajni dhe Singapori pozicionoheshin menjëherë përpara Shqipërisë, ndërsa Holanda dhe Gjermania plotësonin dhjetëshen e vendeve me çmimet më të larta.
Të dhënat tregojnë se shqiptarët paguajnë për naftën më shumë se qytetarët e shumicës së vendeve të zhvilluara, ndërkohë që kanë të ardhura disa herë më të ulëta.
