Përballimi i shpenzimeve të zakonshme mbetet një mision i vështirë për gati gjysmën e familjeve shqiptare.
Sipas të dhënave të Eurostatit, 46,3% e shqiptarëve deklarojnë se e mbyllin muajin me vështirësi ose me shumë vështirësi.
Konkretisht, 32,9% e popullsisë thotë se përballon me vështirësi shpenzimet e nevojshme, ndërsa 13,4% deklaron se ia del me shumë vështirësi.
Të dhënat për Shqipërinë i përkasin vitit 2023 dhe e rendisin vendin të dytin në Europë, pas Greqisë.
Në Greqi, 67% e popullsisë deklaronte se e mbyllte muajin me vështirësi ose me shumë vështirësi.
Shqipëria paraqitet më keq edhe se vendet e tjera të rajonit.
Në Maqedoninë e Veriut, kjo përqindje arrin në 43,8%, në Malin e Zi në 37,9%, ndërsa në Serbi në 31,2%.
Vështirësitë lidhen drejtpërdrejt me pagat e ulëta dhe çmimet gjithnjë e më të larta.
Paga mesatare bruto në Shqipëri arriti rreth 860 euro në muaj gjatë vitit 2025, duke mbetur ndër më të ulëtat në rajon.
Në të njëjtin vit, paga mesatare bruto ishte rreth 1,290 euro në Serbi, 1,245 euro në Bosnjë-Hercegovinë, 1,206 euro në Malin e Zi dhe 1,100 euro në Maqedoninë e Veriut.
Ndërkohë, paga mesatare për një punonjës me kohë të plotë në Bashkimin Europian ishte rreth 3,317 euro në muaj në vitin 2024.
Pavarësisht të ardhurave të ulëta, çmimet e ushqimeve në Shqipëri arritën në vitin 2025 në 102,9% të mesatares së Bashkimit Europian.
Kjo do të thotë se shqiptarët përballen me çmime ushqimore mbi mesataren europiane, megjithëse paguhen disa herë më pak.
Në Bashkimin Europian, 17,6% e popullsisë deklaroi në vitin 2025 se e mbyllte muajin me vështirësi ose me shumë vështirësi.
Eurostat e mat këtë tregues duke pyetur familjet nëse të ardhurat e tyre totale u mjaftojnë për të paguar shpenzimet e zakonshme dhe të nevojshme të jetesës./korrieri
