Pas qindra denoncimeve të qytetarëve për zhvatje përmes skemës së mikrokredive, çështja pritet të mbërrijë në dyert e Prokurorisë së Posaçme, për shkak se Prokuroria e Tiranës ka shpallur moskompetencën. Gazetarja Anila Hoxha, e ftuar mbrëmjen e djeshme në Top Story, ka zbuluar se Prokuroria e Tiranës ka shpallur moskompetencë për skandalin e mikrokredive dhe çështjen ia ka kaluar për hetim Prokurorisë së Posaçme (SPAK). Sipas gazetares, Prokuroria i ka kërkuar SPAK hetime dhe për vetë zyrtarët e Bankës së Shqipërisë për mosveprimet e tyre.
“Zhvillimi më i bujshëm i javës së kaluar, lidhet me një hetim që besoj se nëse ecet me ritmet e duhura për moshpalljen e kompetencës nga Prokuroria e Tiranës për një çështje që ka përfshirë Bankën e Shqipërisë dhe i ka kërkuar hetime SPAK. Për një nga skandelet që Prokuroria e Tiranës e ka konsideruar që nuk është kompetente në lidhje me mikrokreditë.
Ka me dhjetra denoncime të qytetarëve, të cilët janë përfshirë dhe janë viktimizuar nga skemat e mikrokredive duke marrë shuma të vogla edhe në fund ata kanë humbur edhe shtëpitë. Prokuroria e Tiranës kërkon që të hetohen zyrtarët e lartë të Bankës së Shqipërisë për mosvprim, përse nuk kanë ndërhyrë për të vendosur rregulla në tregun e kredive dhe i ka kaluar SPAK-ut. Kjo është një çështje shumë e madhe sepse ka zyrtarë të Bankës që kërkohen hetime.” – tha Anila Hoxha.
ZËRI prej kohësh ka nisur një seri shkrimesh për skandalin me mikrokreditë, ku duket të jetë i përfshirë dhe vetë guvernatori i Bankës së Shqipërisë Gent Sejko, i cili nuk ka vendosur një shifër tavan për interesat me të cilat operojnë mikrokreditë. Por jo vetëm kaq! ZËRI ka zbuluar se një prej kompanive që i janë shitur një pjesë e mikrokredive, është e lidhur me kunatin e Sejkos, ndërkohë që Banka e Shqipërisë, pavarësisht interesimit të vazhdueshëm të mediave, nuk ka dhënë asnjë sqarim mbi skandalin ky dyshohet që të jetë e përfshirë.
Në skenë përveç kunatit, ka dalë dhe emri i bashkëshortes së Gent Sejkos. Elona Sejko (Gjipali, teksa ka qenë drejtore te “Tirana Bank”, ka shitur kredi me firmën e saj tek Elda Ibron, pronare e Micro Credit Albania. Janë 5000 kontrata kredish që kaluan tek “Micro Credit Albania”, për të cilat nuk dihet nëse kreditorët janë informuar apo jo.
Përveç normës stratosferë të interesit, kompanitë që iu japin borxh qytetarëve, shpeshherë i shesin këto kredi në kompani të tjera, duke bërë që qytetarët të bombardohen me presione e telefonata derisa në mënyrë komplet të jashtëligjshme, bllokohen pasuritë e tyre. Një biznes fitimprurës i garantuar, ku njëra zyrë jep kredi, tjetra i mbledh, dhe tjetra sekuestron pasuritë. Ka qenë Ministria e Drejtësisë ajo që ka bërë kallëzim për dy prej këtyre zyrave MCA dhe Final, dhe tashmë pritet që të jetë SPAK, organi që do të ndjekë hetimet për këtë skandal.
