Sot është afati i fundit për dorëzimin e listave të kandidatëve për zgjedhjet parlamentare të 11 majit, një moment kyç për partitë politike në Shqipëri.
Partia Demokratike ka planifikuar dy mbledhje të rëndësishme gjatë ditës: Kryesia e PD do të mblidhet në orën 16:00, ndërsa Këshilli Kombëtar në orën 19:00. Në këto takime do të diskutohen përzgjedhja e kandidatëve dhe strategjia e fushatës, ndërsa pritet të shpallen emrat që do të përfaqësojnë partinë në zonat zgjedhore.
Ndërkohë, edhe Partia Socialiste është në fazën e fundit të përzgjedhjes së kandidatëve. Kryesia e PS pritet të miratojë listat, të cilat do të kombinojnë eksperiencën e figurave të njohura me energjinë e kandidatëve të rinj. Ende mbetet e paqartë nëse kryeministri Edi Rama do të jetë pjesë e listës së kandidatëve, pasi ai ka lënë të hapur mundësinë e tërheqjes nga gara.
Dorëzimi i listave shënon fillimin e një fushatës elektorale të fortë. /korrieri
