Një punonjës i thjeshtë i kompanisë së ndërtimit Salillari, që deri dje ngjiste asfalt nën vapën e verës, sot rezulton i licencuar për të ngritur një park fotovoltaik me kapacitet 82 megawat në Fier. Investimi për ndërtimin e një centrali të tillë diellor kërkon një vlerë që shkon në gati 80 milionë euro. Por kush është Ëngjëll Agalliu? I lindur në Terpan të Beratit, 40 vjeç, Agalliu rezulton sot si pronar i Albanian Solar Power.
Vendimi u mor disa ditë më parë nga Këshilli i Ministrave, i cili miratoi ndërtimin dhe operimin për 49 vjet të një centrali fotovoltaik në fshatin Boçove të Fierit, në emër të kompanisë ‘Albania Solar Power’. Ky investim është nga më të mëdhenjtë në vendin tonë në fushën e energjisë diellore.
Nga kërkimi në QKB, shihet se kompania është krijuar në shkurt të vitit 2024, me një kapital modest prej 100 mijë lekësh të vjetra. Siç shihet në QKB, Agalliu nuk ka dorëzuar as bilance dhe as të dhëna të tjera. Mbetet e paqartë se si kompania e re ka siguruar tokën në Boçovë të Fierit, ku do të ngrihet parku diellor.
Në rastet e mëparshme, praktika më e zakonshme ka qenë marrja me qira e tokës shtetërore nga bashkitë, një proces që kërkon transparencë dhe konkurrencë.
Sesi do të procedohet në këtë rast ende nuk dihet. Ndërkohë që, ZËRI mësoi se në fakt Ëngjëll Agalliu ka qenë pjesë e kompanisë Salillari, ku ka punuar si punonjës asfalti. Një fakt i tillë shihet edhe nga gjurmët në rrjet. Por sapo në media doli lajmi se ai kishte marrë lejen për ndërtimin e një centrali diellor, profili i tij në Facebook u mbyll, ndërsa profili në Linkedin u retushua. Nga Engjell Agalliu, shihet vetëm si Angelo T.
A është rasti një Aferë e dytë si ajo me DH Albania? Në rastin e DH Albanias ishte Avdjol Dobi, një punonjës recepsioni i cili në vitin 2018, regjistroi kompaninë DH Albania, dega shqiptare e “Dunwell Haberman” (Delaware, SHBA).
Kjo kompani, duke përdorur dokumente të falsifikuara (duke pretenduar se Dunwell Haberman është themeluar në 1998), fitoi tenderin e Unazës së Re (lot 1) me vlerë rreth 18 milionë euro dhe një tjetër tender për lidhjen Burrel–Peshkopi me vlerë rreth 10–12 milionë euro. Hetimi zbuloi se në fakt Dobi ishte thjesht një prestanome dhe kontrata u pezullua. Se çfarë do të ndodhë në rastin e Agalliut mbetet për tu parë.
