Një ngjarje e rëndë është shënuar në zonën malore të Llogarasë, ku një tufë kuajsh dhe mushkash, që i përkasin banorëve të Dukatit, është sulmuar me armë gjahu (çifte), duke sjellë vrasjen e 7 kafshëve dhe plagosjen e 3 të tjerave.
Sipas Policisë së Vlorës, pronarët e tufës kanë konstatuar në terren dy mushka të vrara, pesë kafshë ende të zhdukura dhe tre kuaj të plagosur me saçma në qafë. Pamje filmike të siguruara nga banorët tregojnë momentet e sulmit ndaj tufës që kulloste e lirë në mal.
Një mjek veteriner, i shoqëruar nga banorët, ka mbërritur në vendngjarje dhe ka ndërhyrë për të mjekuar kuajt e plagosur, duke u hequr plumbat nga trupat e tyre.
Tufa e dëmtuar i përket Ksenofon Konomit, një nga guidat më të njohura të udhëtimeve turistike me kafshë në zonën e Llogarasë dhe gadishullit të Karaburunit. Dyshohet se sulmi mund të ketë lidhje me aktivitetin e tij turistik dhe se motivi mund të jetë konkurrenca.
Vetë Konomi ka depozituar kallëzim penal në Policinë e Vlorës, duke kërkuar identifikimin e autorëve dhe zbardhjen e plotë të ngjarjes. Policia dhe prokuroria kanë nisur hetimet nën akuzën e “vrasjes dhe keqtrajtimit të kafshëve shtëpiake”.
Në cilësinë e provës materiale janë sekuestruar saçma të nxjerra nga trupat e kafshëve, janë kryer fotografime të detajuara dhe është marrë në pyetje veterineri që mjekoi kuajt e plagosur.
Kjo është hera e parë në Shqipëri që një grup kafshësh të buta sulmohet masivisht me armë zjarri. Ligji shqiptar, që nga viti 2019, parashikon ndëshkime penale për dhunimin, braktisjen apo vrasjen e kafshëve, duke e bërë këtë ngjarje një precedent të rëndë për drejtësinë dhe mbrojtjen e kafshëve në vend.
