Autoritetet greke kanë nisur hetimet për një mjet shpërthyes të improvizuar, i cili dyshohet se do të përdorej për t’i vënë zjarrin një zone të pyllëzuar në Drosia. Mediat greke raportojnë se hetuesit janë shumë afër identifikimit të personit që vendosi pajisjen ndezëse.
Pas analizave në laboratorët mjeko-ligjorë, u gjet një gjurmë gishti që i përkiste një burri me origjinë shqiptare dhe me të kaluar kriminale. Pajisja ndezëse u zbulua të martën nga një qytetar, i cili po ecte në zonë dhe njoftoi menjëherë policinë.
Sipas ekspertëve, mekanizmi ishte i përbërë nga dy cilindra gazi të vendosur pranë njëri-tjetrit dhe një shishe benzine midis tyre, gati për të shkaktuar një zjarr masiv.
Greqia, ashtu si edhe Shqipëria, po përballet me vatra të shumta zjarri të favorizuara nga temperaturat e larta. Shumë prej tyre dyshohet se janë vënë qëllimisht, ndërsa autoritetet po intensifikojnë punën për kapjen e autorëve. Pasojat i vuajnë rëndë natyra dhe banorët e zonave të prekura.
