Kryeministri Edi Rama ka prezantuar kabinetin e ri qeveritar për mandatin e katërt që fituan në zgjedhjet parlamentare të 11 majit.
Shtatë anëtarë të qeverisë nuk do të jenë më pjesë, ndërsa janë afruar 7 emra të rinj që do të jenë pjesë e Këshillit të Ministrave.
Belinda Ballukut iu besua sërish posti i zv/Kryeministres dhe ministres së Infrastrukturës e Energjisë.
Për herë të parë në krye të Ministrisë së Brendshme është emëruar një grua.
Ajo është Albana Koçiu, aktualisht ministre e Shëndetësisë në detyrë. Ajo zëvendëson Ervin Hoxhën në krye të Ministrisë së Brendshme.
Me vendosjen në drejtim të një gruaje në krye, edhe institucioni do të quhet Ministria e Punëve të Brendshme.
Kështu, Ervin Hoxha largohet nga qeveria bashkë me Igli Hasanin. Ministrinë e Jashtme, Kryeministri Rama ia besoi Elisa Spiropalit, e cila lë drejtimin e Kuvendit.
Ministria e Turizmit, Kulturës dhe Sportit bashkohen në një dhe stafetën ia beson sërish Blendi Gonxhes.
Ministria e Ekonomisë dhe Inovacionit i besohet Delina Ibrahimajt, që lë një ministri pa portofol, atë të Sipërmarrjes.
Mirela Kumbaro lë postin si ministre e Turizmit dhe Mjedisit, ndërsa tashmë ministria e Mjedisit ndahet më vete dhe i kalon Sofjan Jaupaj, një emër teknik dhe tërësisht i ri në qeverinë Rama.
Mirela Kumbaro kalon te Ministria e Arsimit, pasi Ogerta Manastirliu do jetë kandidate e PS për Bashkinë e Tiranës.
Në Ministrinë e Shëndetësisë, Rama sjell një emër të ri, Evis Sala, një profesore që lë Italinë për t’iu bashkuar kabinetit ‘Rama 4’.
Edhe Ulsi Manja do të largohet nga qeveria. Ai lë Ministrinë e Drejtësisë dhe në vend të tij emërohet Besfort Lamallari. Manja do të drejtojë komisionin parlamentar të ligjeve.
Po kështu për herë të parë në kabinetin qeverisës do të jetë edhe një ministër me Inteligjencë Artificiale. Diella, anëtarja e parë jo fizike, do të shërbejë për prokurimet publike.
Pirro Vengu rikonfirmohet në krye të Ministrisë së Mbrojtjes.
Ndërsa Ministria e Bujqësisë dhe Zhvillimit Rural i është besuar Andis Salla, kryebashkiaku i Cërrikut.
Ervin Demo do të pasojë Arbjan Maznikun si ministër i Pushtetit Vendor. Toni Gogu do të drejtojë Ministrinë për Marrëdhëniet me Parlamentin.
U rikonfirmuan gjithashtu Majlinda Dhuka si ministre e Shtetit dhe kryenegociate e Shqipërisë, së bashku me Adea Pirdenin si ministre Shtetit për Antikorrupsionin.
“Kjo ishte qeveria e re e eksperiencës së 12 viteve. Na priftë e mbara të gjithëve”, e mbylli fjalën Kryeministri Edi Rama pasi prezantoi kabinetin e katërt qeverisës.
