Në qytetin Namur të Belgjikës po zhvillohet një nga proceset më të mëdha gjyqësore ndaj një grupi të organizuar shqiptar, i njohur si dosja “Sky ECC”, që ka marrë emrin nga aplikacioni i komunikimit të koduar që përdorej për të fshehur veprimtarinë kriminale. Sipas mediave belge, gjyqi po hyn në fazën përfundimtare, me kërkesa të ashpra dënimi ndaj të pandehurve.
Në qendër të akuzave ndodhet Alket Verushi, i konsideruar si drejtues i organizatës, i cili rrezikon 14 vite burg, një gjobë prej 120 mijë eurosh dhe sekuestrime që kapin mbi 2 milionë euro. Ai u arrestua në Spanjë dhe akuzohet për drejtimin e një rrjeti të gjerë që merrej me kultivimin dhe tregtimin e kanabisit, por edhe me shpërndarjen e drogave të forta në disa qytete belge.
Avokatët e tij, Ricardo Bruno dhe Séverine Meurice, e përshkruan klientin si një “njeri pune”, jo si një “boss të madh”. Sipas tyre, ai nuk ka pasur rol drejtues në organizatë dhe dënimet e kërkuara janë joproporcionale. “Është ai që merret me kopshtarët, me mbetjet, me transportin. Nuk është udhëheqës, por një punëtor i zakonshëm,” deklaroi Meurice, duke ironizuar se “për një rast që kërkon një pistoletë me fishekë plastikë, prokuroria ka përdorur bazukën”.
Një tjetër i pandehur, i njohur me nofkën “Aldo milioneri”, për të cilin kërkohen 10 vite burg, përshkruhet nga prokuroria si “agjent imobiliar i plantacioneve të kanabisit”. Avokatët e tij, Mevlut Turk dhe Étienne Gras, e mbrojtën si një person që jeton nga puna e ndershme me bashkëshorten dhe që akuzohet padrejtësisht për shkak të stilit të jetesës luksoze. “Një Rolex në dorë e një Porsche nuk janë prova për trafik droge,” tha me ironi avokati Gras.
Një nga pikat më të debatuara të procesit lidhet me fitimet e pretenduara nga aktiviteti kriminal, ku prokuroria flet për rreth 11 milionë euro të ardhura nga 10 plantacione të shkatërruara në shkurt 2024. Mbrojtja i kundërshton këto shifra, duke i cilësuar të fryra dhe jorealiste. “Në disa raste prokuroria përmend plantacione që ‘kanabisi rritet vetë’ – një absurditet që tregon gabime të rënda në llogaritje,” tha avokatja Meurice me sarkazëm.
Vendimi i gjykatës së Namurit pritet të shpallet brenda një muaji, ndërsa ky proces konsiderohet një nga më të mëdhenjtë ndaj një rrjeti shqiptar të trafikut të drogës në Belgjikë, me sekuestrime, hetime ndërkombëtare dhe përmasa financiare që shkojnë në dhjetëra milionë euro. /DHnet
