Gjykata e Posaçme ka dhënë arsyetimin mbi masat e sigurisë ndaj zv.kryeministres Belinda Balluku, drejtorit të ARRSH Gentian Gjyli dhe administratorit të KESH Erald Elezi, duke konkluduar se të tre paraqesin rrezik konkret për procesin hetimor. Dokumentet e siguruara tregojnë se gjykata ka vlerësuar se ekziston një shkak i rëndësishëm që vë në rrezik marrjen dhe vërtetësinë e provave, për shkak të funksioneve të larta që të pandehurit kanë ushtruar.
Sipas arsyetimit, pozitat drejtuese në Ministrinë e Infrastrukturës, ARRSH dhe KESH krijojnë mundësi reale për të ndërhyrë në dokumente, për t’i fshehur ose për t’i asgjësuar, duke cenuar drejtpërdrejt hetimin. Gjykata nënvizon se organi procedues aktualisht po verifikon dokumente të administruara nga institucionet që vetë të pandehurit i kanë drejtuar, çka shton rrezikun për manipulim.
GJKKO argumenton se Balluku, Gjyli dhe Elezi paraqesin edhe rrezik arratisjeje, për shkak të dënimeve të parashikuara në akuzat që po hetohen, të cilat shkojnë deri në pesë vite burg. Ky faktor, i kombinuar me profilin publik dhe mundësitë e tyre financiare dhe institucionale, sipas gjykatës shton gjasat që ata të shmangin procesin penal.
Në pikën 174 të vendimit, gjykata thekson se rrethanat e faktit dhe personaliteti i të pandehurve krijojnë rrezik që ata të kryejnë përsëri të njëjtat vepra për të cilat po procedohen. Hetimi lidhet me menaxhimin e fondeve publike, një proces që të tre e kanë administruar vetë, ndaj gjykata vlerëson se ndikimi i tyre mbi institucionet ku kanë drejtuar mbetet i lartë.
GJKKO deklaron se masat e sigurisë me karakter ndalues janë të domosdoshme për të mbrojtur provat, për të garantuar mbarëvajtjen e hetimit dhe për të shmangur çdo tentativë të mundshme për të ndikuar procesin. Në arsyetim citohet neni 229 i Kodit të Procedurës Penale, ku theksohet se masa duhet të vendoset në raport me rrezikshmërinë e të pandehurve, rëndësinë e faktit dhe mundësinë e vazhdimësisë së veprimeve me pasoja penale.
Në përfundim, gjykata arsyeton se vetëm masat shtrënguese mund të garantojnë integritetin e hetimit dhe ruajtjen e provave në një çështje që përfshin funksionarë të lartë të shtetit. /korrieri
