Ditët e para të vitit 2026 janë shënuar nga një bilanc i rëndë aksidentesh rrugore, me pesë viktima në vetëm dy ditë, duke e kthyer nisjen e vitit në një alarm serioz për sigurinë në rrugë.
Mëngjesin e sotëm, një aksident i rëndë u regjistrua në aksin Lezhë Shkodër, në afërsi të fshatit Gocaj, ku dy automjete u përplasën me forcë. Si pasojë, humbën jetën dy persona, ndërsa një grua dhe një fëmijë mbetën të plagosur.
Viktimat janë një çift bashkëshortësh nga Puka, Elona Florini 42 vjeçe dhe Petrit Florini 53 vjeç. Ky i fundit ishte efektiv policie, ndërsa bashkëshortja e tij ushtronte profesionin e mësueses. Të plagosurit janë transportuar për ndihmë mjekësore, ndërsa trupat e pajetë u nxorën nga mjetet me ndihmën e forcave zjarrfikëse.
Policia dhe grupi hetimor ndodhen në vendngjarje dhe po punojnë për zbardhjen e shkaqeve të aksidentit.
Ky është aksidenti i dytë fatal i vitit 2026. Një ditë më parë, në orët e para të mëngjesit, një tjetër përplasje tragjike ndodhi në aksin Gjirokastër Tepelenë, në zonën e njohur si Bypass.
Nga përplasja e dy automjeteve humbën jetën tre të rinj, Klejdi Myftari 24 vjeç, Anxhelo Ruçi 27 vjeç dhe Martin Dulaj 25 vjeç. E fejuara e këtij të fundit, Arsida Demiri 19 vjeçe, mbeti e plagosur rëndë dhe u transportua në Spitalin e Traumës në Tiranë, ku ndodhet në gjendje kritike.
Bilanci prej pesë viktimash në vetëm dy ditë e vendos sërish në qendër të vëmendjes problematikën e sigurisë rrugore, duke e nisur vitin e ri me një realitet të hidhur në rrugët e vendit.
