28 janar – Dita Ndërkombëtare e Mbrojtjes së të Dhënave Personale.
Dje, mesazhi i Komisionerit për të Drejtën e Informimit dhe Mbrojtjen e të Dhënave Personale ka mbërritur në telefonat e shumicës së shqiptarëve, si për të na kujtuar edhe një herë se të dhënat tona janë më të pasigurta se kurrë.
Sepse ato u morën njëherë nga patronazhistët, më pas u hakeruan, dhe më tej ranë në duart e Mirlinda Karçanajt dhe shokëve të saj, për t’u përdorur si mish për top në pazaret e pushtetit, presionit dhe manipulimit.
E megjithatë, sot Besnik Dervishi, komisioneri për mbrojtjen e të dhënave personale — besnik i partisë së tij — na dërgon një mesazh për të na kujtuar se të dhënat tona janë në duart e tij dhe të partisë së tij. Jo si paralajmërim, por si një lloj garancie politike: rrini të qetë, privatësia juaj është nën kontrollin tonë.
Mesazhi është shpërndarë përmes One dhe Vodafone, të cilat duket se janë thjesht kanalet e duhura për të na uruar një ditë po aq idiote sa edhe sistemet e sigurisë që supozohet të mbrojnë të dhënat tona.
Pra, shteti që i humbi, i shpërndau, i politizoi dhe i ekspozoi të dhënat personale të qytetarëve, sot na këshillon t’i ruajmë vetë. Një këshillë morale nga i njëjti sistem që e ka shndërruar privatësinë në një material të konsumueshëm politik.
Në fund, ky nuk është një mesazh për sigurinë e të dhënave.
Është një përkujtimore cinike se në Shqipëri privatësia nuk është më e jona — është pronë e pushtetit që na uron ta mbrojmë, pasi e ka shkelur tashmë.
