Departamenti Amerikan i Drejtësisë ka publikuar dokumente të reja në lidhje me rastin e financierit pedofil Jeffrey Epstein. Zv.Prokurori i Përgjithshëm Todd Blanche njoftoi publikimin, duke specifikuar se dokumentet përfshijnë “më shumë se 3 milion faqe duke përfshirë 2 000 video dhe 180 000 foto”.
Ky publikimi i gjerë i dokumenteve vjen pas javësh kritikash ndaj Departamentit të Drejtësisë për dështimin në përmbushjen e detyrimit të tij sipas ligjit federal për të bërë transparente të gjitha dokumentet që lidhen me Epstein.
“Ne nuk e mbrojtëm Trump. Mund t’ju siguroj se ne ndoqëm statutin dhe nuk mbrojtëm askënd. Shtëpia e Bardhë nuk i tha këtij departamenti se si ta kryente detyrën, çfarë të kërkonte, çfarë të redaktonte ose çfarë të mos redaktonte” – u mbrojt Blanche.
Gjatë konferencës për shtyp, ai bëri të qartë se dosjet e reja të publikuara sot nuk do të zbulojnë asgjë rreth presidentit: “Mendoj se ka një etje për informacion që nuk mendoj se do të plotësohet nga këto dokumente.” Blanche më pas deklaroi se materiali i publikuar sot përfshin video dhe imazhe pornografike që nuk janë krijuar domosdoshmërisht nga Epstein ose bashkëpunëtorët e tij.
Blanche shpjegoi se dosjet “përmbajnë sasi të mëdha pornografie dhe imazhesh komerciale që u sekuestruan nga pajisjet e Epstein, por nuk u fiksuan prej tij ose ndonjë personi të afërt me të”. Megjithatë, “disa nga imazhet duket se janë bërë nga vetë Epstein ose të tjerë të afërt me të”, – shtoi zv.Prokurori i Përgjithshëm.
Sipas “Daily Mail”, mes miliona dokumenteve të publikuara është edhe një e-mail i 18 korrikut 2013, që Epstein i shkroi vetes, duke deklaruar se Bill Gates kishte marrë një sëmundje seksualisht të transmetueshme pasi kishte fjetur me gra ruse. Në këtë e-mail, të botuar nga tabloidi britanik, Jeffrey Epstein sulmon themeluesin e Microsoft për ndërprerjen e miqësisë së tyre: “Për t’i shtuar fyerje lëndimit, tani më luteni të fshij e-mailet në lidhje me sëmundjen tuaj seksualisht të transmetueshme, kërkesën tuaj që t’ju jap antibiotikë për t’ia fshehuraz Melindës dhe përshkrimin e penisit tuaj”.
Këto pretendime nuk mbështeten nga prova të pavarura dhe mbeten akuza. Megjithatë, mesazhe të tjera, të përfshira gjithashtu në dosjet e Departamentit të Drejtësisë, duket se janë drafte të një letre që i atribuohet Boris Nikolic, këshilltarit të atëhershëm shkencor të Gates, me rastin e dorëheqjes së tij nga “Fondacioni Bill dhe Melinda Gates”. Në letër, Nikolic pretendon se “ishte i përfshirë në një mosmarrëveshje serioze martesore midis Melindës dhe Bill” dhe se kishte marrë pjesë dhe “gabimisht kishte dhënë pëlqimin për “aktivitete” që varionin nga moralisht të papërshtatshme deri në etikisht të dyshimta”, deri në pikën e “kufirit dhe potencialisht kalimit të vijës së paligjshmërisë”.
Këto përfshinin “ndihmë ndaj Bill për të marrë ilaçe për të adresuar pasojat e marrëdhënieve seksuale me vajza ruse” dhe “lehtësimin e marrëdhënieve të tij të paligjshme me gra të martuara”. Gates më parë ka pranuar takimin me Epstein, duke thënë se i vjen keq për ato takime dhe duke mohuar çdo keqbërje. Dokumentet e publikuara përfshijnë gjithashtu imazhe të pabotuara më parë të të dyve së bashku.
3200 dokumente përmendin Trump
Nga më shumë se 3 milion dokumente, të paktën 3200 përmendin Presidentin e SHBA-së Trump, dhe numri mund të rritet, raporton New York Times, i cili po shqyrton dosjet. Disa nga dokumentet që përmendin Trump duket se janë raporte të dërguara hetuesve në lidhje me çështjen Epstein, të tjera janë referenca për Trump në artikuj gazetash që u futën në dosje.
Epstein dhe miqtë e tij shkëmbyen shpesh artikuj, dhe hetuesit federalë kanë shqyrtuar gjithashtu raportet e medias si pjesë e hetimit të tyre. Ka edhe email-e që thjesht i referohen Trump. Epstein, për shembull, diskutonte rregullisht për manjatin, madje duke spekuluar mbi shanset e tij në zgjedhjet presidenciale të vitit 2016.
“Epstein i ftuar në një mbledhje fondesh për Hillary Clinton”
Ndër zbulimet në dosjet e reja është episodi i ftesës së Sekretarit të Tregtisë të SHBA-së, Howard Lutnick, drejtuar Epstein në një mbledhje fondesh që ai po organizonte për demokraten Hillary Clinton. Sipas CNN, Lutnick ishte fqinj i Epstein në New York dhe më parë ka thënë se e vizitoi apartamentin e ish-financierit dhe u neverit nga salla e masazhit që pa.
Musk i drejtohet Epstein: “Kur do të shkojmë në ishullin tuaj?”
Emri i Elon Musk përmendet gjithashtu shpesh. Më herët ai ka thënë se ka hedhur poshtë përpjekjet e Epstein për ta bindur të vizitonte ishullin e tij në Karaibe. Në vitin 2013, themeluesi i Teslës i shkroi një email financierit për të koordinuar. Ai planifikoi një udhëtim në ishullin e tij, duke pyetur konkretisht “kur do shkojmë”.
“Nuk dua të zgjohem dhe të të gjej të vdekur”.
Sipas dosjeve të reja, shoku i qelisë së Epstein, Efran Reyes, dyshohet se i është lutur të mos i marrë jetën vetes në hapësirën që ndanin. Reyes ishte transferuar në një burg tjetër një ditë para vdekjes së Epstein, një transferim i rënë dakord më parë. Reyes i tha Epstein të mos varte veten në qelinë e tyre: “Nuk dua të zgjohem dhe të të gjej të vdekur”. “Mos u shqetëso, nuk do të të shkaktoj kurrë probleme”, – i është përgjigjur Epstein.
“Besimi dhe privatësia e viktimave u shkelën”
Bradley Edwards, një avokat që përfaqëson dhjetëra gra të përfshira në skandal, akuzoi Departamentin e Drejtësisë të SHBA-së për shkelje të besimit, privatësisë dhe të drejtave të viktimave të Jeffrey Epstein me publikimin e fundit të dokumenteve.
