Një dokumentar i ri i Channel 4, me titull “The Trial”, ka rikthyer në vëmendje akuzat që janë ngritur ndër vite ndaj Michael Jackson, duke sjellë edhe disa regjistrime audio të papublikuara më parë, në të cilat ylli i muzikës pop flet në mënyrë tejet personale për fëmijët.
Seria dokumentare fokusohet në periudhën e procesit të bujshëm gjyqësor ndaj Jackson-it dhe synon të hedhë dritë mbi aspekte të çështjes përmes materialeve që, sipas autorëve, nuk janë bërë publike deri më sot.
Në disa prej këtyre regjistrimeve, këngëtari dëgjohet të shprehet me deklarata që sot konsiderohen shqetësuese, në kontekstin e akuzave për abuzim seksual ndaj të miturve.
Në një nga fragmentet audio, Michael Jackson dëgjohet të thotë: “Ata duan të më prekin dhe përqafojnë “. “Nëse do të më thoshe tani: ‘Michael, nuk do të mund të shohësh më kurrë fëmijë’, do të vetëvritesha”.
Në një tjetër regjistrim ai shprehet se “fëmijët thjesht duan të më prekin dhe të më përqafojnë”, ndërsa në një moment tjetër thotë: “Fëmijët përfundojnë duke u dashuruar me personalitetin tim. Ndonjëherë kjo më fut në telashe”.
Dokumentari i vendos këto deklarata në kuadrin e akuzave të ngritura ndaj Jackson-it, duke rihapur debatin mbi sjelljen dhe qëndrimin e tij ndaj të miturve.
