Një nga trafikantët më të kërkuar të drogës në botë, bosi meksikan i kartelit i njohur si “El Mencho”, u vra nga ushtria meksikane.
Baroni i drogës, emri i vërtetë i të cilit është Nemesio Rubén Oseguera Cervantes, u vra të dielën në shtetin perëndimor të Jalisco-s.
Gangsteri 59-vjeçar ishte lider i një grupi që vitet e fundit është shndërruar në organizatën kriminale më të fuqishme dhe më famëkeqe të Meksikës: Kartelin Jalisco Nueva Generacion (CJNG).
Edhe pse më pak i famshëm ndërkombëtarisht se Karteli i Sinaloas i Joaquín “El Chapo” Guzmán-it, i cili ndodhet në burg, grupi Jalisco është një emër i njohur në Meksikë, ku është famëkeq për shfaqjet e tij të dhunës brutale dhe arsenalin e madh me stil ushtarak.
Video e momentit të ekzekutimin të “El Mencho”-s:
Shtetet e Bashkuara kishin ofruar një shpërblim prej 15 milionë dollarësh për kapjen e bosit të drogës, i akuzuar për kontrabandimin e sasive të mëdha të kokainës, fentanilit dhe metamfetaminës përtej kufirit jugor të SHBA-së.
Oseguera ishte i fundit i një brezi trafikantësh droge që, si El Chapo Guzmán, El Mayo Zambada dhe Ignacio Coronel, kishin nisur karrierën e tyre kriminale në shekullin e kaluar, kur Partia Revolucionare Institucionale (PRI) dominonte Meksikën, nga qytetet më të vogla deri në dhomat e përfaqësuesve, dhe krimi i nënshtrohej pushtetit zyrtar.
Me kalimin e viteve, gjërat ndryshuan. PRI humbi pushtetin dhe aleancat e vjetra mes krimit dhe shtetit u zhdukën; grupet kriminale u fragmentuan dhe të reja u shfaqën, duke krijuar dhe ushqyer krahë të fuqishëm të armatosur, ndërsa Meksika u përmbyt nga armë që vinin nga SHBA-ja.
Pikërisht në këto rrethana El Mencho, më i afti ndër ta, veproi. Asnjëri prej tyre nuk mbetet i lirë.
El Chapo dhe El Mayo, liderë themelues të Kartelit të Sinaloas, u kapën dhe po vuajnë dënime në burgjet amerikane, nga të cilat nuk ka gjasa të lirohen ndonjëherë. Tani, El Mencho ka vdekur në të njëjtin rajon ku u ngrit pushteti i tij.
Megjithëse lindi dhe u rrit në Michoacán, mes Apatzingán-it dhe Aguililla-s, ku hyri për herë të parë në botën kriminale, ai së fundmi ishte fshehur në Jalisco, shtetin që e adoptoi, në zonën e ashpër mes Guadalajara-s, qytet pritës i disa ndeshjeve të Kupës së Botës, dhe Puerto Vallarta-s, perlës së bregdetit të Paqësorit. Burime brenda kabinetit federal të sigurisë e kishin lokalizuar pranë Atequiza-s, një “Pueblo Mágico” i shpallur në Jalisco.
I lindur më 17 korrik 1966, në qytetin Naranjo de Chila, El Mencho ishte djali i fermerëve që emigruan në Kaliforni, ku u realizua një nga të paktat fotografi të tij: i ri, me flokë kaçurrela dhe një vështrim sfidues.
Fotografia tjetër, më e njohur, që e paraqet me shprehje të qetë dhe mustaqe, është ajo që është përdorur gjithmonë për të identifikuar njeriun që krijoi një perandori kriminale, fillimisht në trafikimin në shkallë të vogël, më pas si vrasës me pagesë dhe bos lokal, deri sa u bë një trafikant i madh ndërkombëtar droge.
Oseguera ishte objektivi më i kërkuar në luftën kundër trafikut të drogës pas rënies së liderëve të Kartelit të Sinaloas, El Chapo Guzmán dhe El Mayo Zambada, si dhe ekstradimit në Shtetet e Bashkuara të një tjetër baroni të madh të drogës, Rafael Caro Quintero.
CJNG u formua në vitin 2009 dhe është rritur duke u shndërruar në një nga kartelet më të dhunshëm të drogës në Meksikë.
Vlerësohet se ka kapacitetin më të lartë për trafikimin e kokainës, heroinës dhe metamfetaminës në Meksikë, dhe gjatë viteve të fundit ka përfshirë edhe trafikimin e fentanilit drejt Shteteve të Bashkuara.
Nën drejtimin e Oseguera Cervantes, CJNG ka qenë përgjegjës për shumë vrasje kundër grupeve rivale të trafikut dhe forcave meksikane të rendit. Kohët e fundit, operativë të CJNG, dyshohet nën drejtimin e tij, janë përfshirë në tentativa për atentate ndaj zyrtarëve të qeverisë meksikane.
Që nga viti 2017, Oseguera Cervantes është paditur disa herë në Gjykatën e Qarkut të SHBA-së për Distriktin e Kolumbias.
Aktakuza më e fundit shtesë, e depozituar më 5 prill 2022, e akuzon Oseguera Cervantes për komplot dhe shpërndarje të substancave të kontrolluara (metamfetaminë, kokainë dhe fentanil) me qëllim importimin e paligjshëm në Shtetet e Bashkuara, si dhe për përdorim arme zjarri gjatë dhe në lidhje me krime të trafikut të drogës.
Fundi i një baroni droge:
Vdekja e tij shënon gjithashtu një fitore të madhe në luftën e Meksikës kundër karteleve përgjegjëse për trafikimin e kokainës dhe fentanilit me vlerë miliarda dollarë në Shtetet e Bashkuara.
Por pritet gjithashtu që kjo të shkaktojë një valë dhune në të gjithë Meksikën.
“Do të ketë një sasi të jashtëzakonshme dhune”, tha Wanda Felbab-Brown, një eksperte për krimin e organizuar ndërkombëtar. Ajo e krahasoi Osegueran me baronë të tjerë të drogës që janë kapur ose vrarë vitet e fundit, si Guzman dhe Ismael “El Mayo” Zambada, të dy nga karteli Sinaloa.
Guvernatori i shtetit Jalisco, Pablo Lemus Navarro, u bëri thirrje banorëve të qëndrojnë në shtëpi derisa situata të vihet nën kontroll.
Ambasada amerikane gjithashtu u bëri thirrje qytetarëve amerikanë në Meksikë të kërkojnë strehim të sigurt.
