Qytetarët ndodhen përpara dilemës nëse duhet të bëjnë rivlerësimin e pasurive të tyre apo jo dhe cilën metodë të zgjedhin për të rritur vlerën e pronës?
Një analizë e ALTAX, thekson se për të pasur sa më shumë përfitime, pronarët dhe bizneset duhet të marrin vendime të bazuara në strategji dhe rrezikfaktorë realë, jo thjesht formalitete administrative.
Konkretisht, rekomandohet një analizë e pronës që disponojnë qytetarët, nëse është standarde apo ka karakteristika unike.
Qytetarët sugjerohen që të zgjedhin metodën e duhur të rivlerësimit duke marrë parasysh, se për pronat standarde, metoda e çmimeve zonale mund të mjaftojë, referuar kjo Tiranës, duke qenë se në bashkitë e tjera procesi do të jetë i detyruar të bëhet me ekspert privat. Ndërsa për pronat komplekse, të vjetra, me potencial zhvillimi ose me vlerë tregu më të lartë, rekomandohet eksperti i licencuar.
Po ashtu rekomandohet marrja e ofertave nga 2-3 ekspertë të licencuar për të krahasuar çmimet dhe cilësinë e shërbimit.
Qytetarët duhet të sigurohen që të përgatisin dokumentacionin e saktë për të shmangur vonesa dhe probleme ligjore.
Rreziqet kryesore që mund të ndodhin nga procesi i rivlerësimit lidhen me nënvlerësimin e pronës dhe përdorimin e çmimeve zonale për prona jo standarde, çka mund të çojë në vlerë tatimore shumë më të lartë në momentin e shitjes dhe humbje të mundshme financiare në afat të gjatë.
Mungesa e ekspertizës së duhur është një tjetër rrezik. Për bizneset, ligji detyron përdorimin e ekspertit dhe mosrespektimi i legjislacionit mund të sjellë gjoba administrative; vlerësime jo të sakta në bilancet financiare; vështirësi në marrjen e financimeve.
Mosplanifikimi i investimeve për pronat me potencial zhvillimi sërish konsiderohet si risk. Nënvlerësimi mund të rezultojë në humbje të mundësive për projekte të ardhshme apo marrëveshje strategjike./scan tv
