Gazetarja Klodiana Lala, e ftuar në emisionin “Opinion”, ka hedhur dritë mbi dinamikat që çuan në shkarkimin e Ilir Prodës duke i lidhur ato me ndikime politike dhe hetime të mundshme nga SPAK.
Lala tha se emërimet në Policinë e Shtetit nuk kanë ndjekur rrugën e meritokracisë, por janë diktuar nga eksponentë jashtë strukturave zyrtare. Sipas gazetares, rreth 70% e drejtuesve të komisariateve, përfshirë vetë ish-kryepolicin Proda, janë emëruar me ndikimin e drejtpërdrejtë të Ergys Agasit.
Ndonëse lirimi nga detyra erdhi pas protestës së tensionuar të 28 shkurtit, Lala zbuloi se vendimi i Kryeministrit Edi Rama për largimin e Prodës ishte marrë kohë më parë. Shkak për këtë duket se është bërë një debat i ashpër mes kreut të qeverisë dhe drejtorit të policisë.
Sipas gazetares, largimi i Prodës është vetëm fillimi i një “fshese” më të gjerë. Pritet që të gjithë zyrtarët e besuar të tij nëpër rrethe të largohen gradualisht, duke shënuar një ristrukturim të plotë të zinxhirit komandues.
Një tjetër element i rëndë që rëndon mbi figurën e ish-kreut të policisë janë dyshimet për lidhje me grupe kriminale, konkretisht me vëllezërit Çopja. Klodiana Lala konfirmoi se ekzistojnë dyshime serioze për dekonspirim të operacioneve policore, çka ka bërë që Proda të jetë nën lupën e Prokurorisë së Posaçme (SPAK).
Këto akuza nisin nga zbërthimi i platformave të koduara të komunikimit, ku emri i zyrtarëve të lartë dyshohet se shfaqet në kontekste favorizimi ndaj elementëve kriminalë.
