Një përleshje masive mes dy grupeve të të rinjve, në rrethana dhe motive që ende po hetohen, ka ndodhur paraditen e sotme në qytetin e Korçës.
Një person ka përfunduar i plagosur në spital, teksa përveç grushteve e shkelmave, mësohet se janë përdorur edhe sende të forta.
Ngjarja ndodhi në lagjen nr. 2 të qytetit, në afërsi të kinemasë, mësohet se në konflikt janë përfshirë disa të rinj të cilët janë goditur me njëri-tjetrin.
Në spital ka mbërritur i dëmtuar një person i cili sipas burimeve nga bluzat e bardha, ka dëmtime në trup pasi dyshohet që pasi është goditur, është rrëzuar në kangjella dhe ka pësuar çarje.
I dëmtuari po merr ndihmë mjekësore në spital ndërsa ndodhet jashtë rrezikut për jetën. Policia ka mbërritur menjëherë në vendin e ngjarjes pasi pas konfliktit, të rinjtë e përfshirë janë larguar nga vendngjarja.
Nga ana e grupit hetimor, po sekuestrohen kamerat e sigurisë që ndodhen në bizneset e zonës, si edhe po pyeten për zbardhjen e dinamikës dhe motiveve.
