Bordi i Transparencës ka vendosur çmimet e reja të karburanteve, duke ulur tavanet për shitjen me pakicë nën kufijtë që aktivizojnë reduktimin e akcizës.
Sipas vendimit të marrë në mbledhjen e datës 18 prill 2026, çmimi maksimal i naftës për konsumatorët do të jetë 197 lekë për litër, ndërsa benzina 172 lekë për litër. Për tregun me shumicë, gazoili do të shitet jo më shumë se 185 lekë për litër dhe benzina 160 lekë për litër.
Vendimi ka hyrë në fuqi këtë të shtunë në orën 10:30 dhe do të mbetet në fuqi deri në mbledhjen e ardhshme të Bordit, kur pritet të reflektohen luhatjet e reja të tregut.
Në njoftimin zyrtar, autoritetet paralajmërojnë operatorët e tregtimit të karburanteve për zbatim të detyrueshëm të çmimeve të përcaktuara, duke theksuar se çdo shkelje do të shoqërohet me pezullim të aktivitetit.
Në të njëjtën kohë, sqarohet se çmimet aktuale janë nën pragjet e përcaktuara nga Akti Normativ nr. 1, datë 3 prill 2026, i cili parashikon ulje të akcizës në 80% vetëm nëse nafta kalon 220 lekë për litër ose benzina 200 lekë për litër. Në kushtet aktuale, me çmime më të ulëta se këto nivele, akciza do të vijojë të aplikohet e plotë, në nivelin 100%.
Ministria e Ekonomisë dhe Inovacionit, në bashkëpunim me Ministrinë e Financave dhe atë të Infrastrukturës dhe Energjisë, deklaron se mbetet e angazhuar për mbrojtjen e konsumatorëve dhe garantimin e konkurrencës në treg.
