Gjykata e Posaçme ka dalë me një vendim këtë të mërkurë sa i takon grupit që trafikonte armë drejt Mbretërisë së Bashkuar.
Është dënuar me 13 vite burg (në total), Adulla Hoxhaj, i dyshuar si ‘koka’ e grupit. Siç thuhet në njoftim, me gjykim të shkurtuar ai do të vuajë 8 vite e 8 muaj në qeli.
Me 12 vite burg është dënuar një tjetër drejtues i këtij grupi kriminal. Bëhet fjalë për Admir Tutaj, i cili me gjykim të shkurtuar do të qëndrojë 8 vite në burg.
Një tjetër anëtar i grupit, Bojken Turtulli, është dënuar po me 8 vite burg, ndërsa është liruar Rifat Avdiaj. Sipas gjykatës, nuk provohet se ai ka kryer veprën penale për të cilën akuzohet.
Në total, grupi ka marrë 24 vite e 8 muaj burgim për përfshirje kryesisht në trafikimin e armëve dhe municioneve, si dhe me veprimtari të kryera në kuadër të një grupi të strukturuar kriminal.
Akuza tjetër është ajo e mbajtjes dhe posedimi i paligjshëm i armëve të zjarrit dhe municionit, ndërsa për një pjesë të të pandehurve çështja lidhej edhe me sasi të ndryshme armësh dhe fishekësh të sekuestruar gjatë kontrolleve.
GJKKO ka vendosur konfiskimin e një sasie të madhe armësh, municionesh dhe pajisjesh të lidhura me to, të sekuestruara nga Hoxhaj. Pistoleta të ndryshme, armë automatike, karikatorë, qindra fishekë të kalibrave të ndryshëm, si dhe pajisje ndihmëse si dylbi, lazer, silenciatorë, elektroshok dhe mjete të tjera të përdorura për armë.
Ndërkohë, automjete, mjete motorike dhe dokumente të ndryshme pasurore, do të shqyrtohen në hetim financiar/pasuror për të verifikuar origjinën dhe lidhjen e tyre me veprimtarinë kriminale të dyshuar.
