Për herë të dytë brenda pak javësh, Agjencia Kombëtare e Ushqimit është detyruar të ndërhyjë te i njëjti subjekt kateringu, pasi dhjetëra kursantë të Akademisë së Sigurisë përfunduan sërish në spital me shenja të helmimit.
Ironikisht, bëhet fjalë për të njëjtën kompani që ishte në qendër të skandalit të mëparshëm, ku analizat zyrtare konstatuan ndotje me Escherichia coli dhe stafilokok, por aktiviteti iu lejua të rifillonte.
Pas episodit të ri, AKU njofton se ka kryer kontrolle në subjektin SORI-AL dhe në ambientet ku përgatitet ushqimi, duke deklaruar se kushtet higjieno-sanitare dhe dokumentacioni rezultojnë të rregullta. Janë marrë gjithsej 28 mostra ushqimore dhe 5 mostra tampon për analiza laboratorike në ISUV, ndërsa aktiviteti i subjektit është pezulluar deri në daljen e rezultateve.
Pyetja që mbetet është e thjeshtë: nëse i njëjti subjekt është përfshirë në dy episode të ngjashme brenda një kohe kaq të shkurtër, a mjafton vetëm marrja e mostrave pasi dëmi është bërë, apo duhej të ishin marrë masa më të forta që pas rastit të parë?
