Një edukatore 32-vjeçare është arrestuar në Tiranë, pasi dyshohet se ka ushtruar dhunë ndaj një fëmije 2 vjeç në një kopsht privat.

Në pranga është vënë B.H., ndërsa rasti është denoncuar në polici nga babai i të miturit.

Sipas të dhënave, prindi ka vënë re shenja dhune në fytyrën e fëmijës dhe e ka dërguar fillimisht në spital për ekzaminime.

I mituri kishte një nxirje në faqe dhe shenja skuqjeje në zonën e veshëve.

Ngjarja dyshohet se ka ndodhur në kopshtin “Lala”, në rrugën “Aleksandër Moisiu”, në zonën e ish-Kinostudios.

Nga verifikimet e kryera dhe këqyrja e pamjeve filmike, dyshohet se edukatorja e ka goditur fëmijën dy herë me shuplakë.

Sipas burimeve, 2-vjeçari po qante dhe nuk po e zinte gjumi në momentin kur është ushtruar dhuna.

Gjatë marrjes në pyetje, 32-vjeçarja mësohet se ka pranuar se e kishte goditur fëmijën, duke deklaruar se nuk po arrinte ta qetësonte.

Pas administrimit të denoncimit, ekzaminimeve mjekësore dhe pamjeve të kamerave të sigurisë, policia ka bërë arrestimin e saj. Materialet procedurale pritet t’i kalojnë prokurorisë për veprime të mëtejshme.