KORRIERI
Sezoni turistik po shkon drejt fundit, ndërsa Fondi Shqiptar i Zhvillimit ka finalizuar tre procedura me fond limit total 256 milionë lekë pa TVSH për çadra, shezlongë dhe infrastrukturë në plazhet publike të Durrësit.
Procedurat vijnë në një kohë kur qytetarët vijojnë të ankohen se hapësirat publike përgjatë bregdetit janë të pakta dhe në shumë zona dominohen nga stacionet private të plazhit.
Vetë Bashkia Durrës publikoi në qershor hartën dhe tabelat orientuese të plazheve publike, por në hartë këto hapësira shfaqen si parcela të kufizuara mes sipërfaqeve të dhëna për menaxhim privat.
Ndërkohë, më 17 korrik FSHZH zhvilloi tenderin për blerjen e çadrave të plazhit në Durrës, me fond limit 120 milionë lekë pa TVSH.
Më 3 gusht u shpall fituese kompania “ERALD”, në pronësi të Arjan Mujës.
Një tjetër procedurë, me fond limit 64 milionë lekë, parashikon furnizimin dhe vendosjen e strukturave prej druri dhe tabelave për plazhet publike.
Në këtë tender mori pjesë vetëm bashkimi i operatorëve të Albor Karajt dhe kompanisë “KEGLI-DURI”, me ndarje respektivisht 70% dhe 30% të angazhimit, ndërsa kontrata u zyrtarizua më 5 gusht.
Tenderi i tretë lidhet me blerjen e shezlongëve për plazhet publike të Durrësit dhe ka fond limit 72 milionë lekë pa TVSH, me fituese kompaninë “AN&RA”, në pronësi të Anton Rajtës.
Koha kur janë zhvilluar këto procedura ngre pikëpyetjen kryesore: përse çadrat, shezlongët dhe infrastruktura e plazheve publike po prokurohen në korrik dhe gusht, kur pjesa më e madhe e sezonit turistik ka kaluar?
Debati bëhet edhe më i fortë për shkak të mungesës së hapësirave të lira në terren. Reagimet e qytetarëve në rrjetet sociale kundërshtojnë deklaratat politike se pushuesit kanë mundësi reale të zgjedhin mes plazheve publike dhe atyre private.
Ndërkohë, drejtori i FSHZH-së, Dritan Agolli, vijon të jetë në krye të institucionit që administron këto kontrata, ndërsa më herët është marrë në pyetje nga SPAK në kuadër të hetimeve për një tjetër procedurë prokurimi të FSHZH-së.
Në fund të sezonit, pyetja mbetet e thjeshtë: ku do të vendosen konkretisht çadrat dhe shezlongët e blerë me këto fonde dhe kur do të jenë realisht në dispozicion të qytetarëve?
