Edi Rama, me gjasë, po përgatitet për ndryshime në qeveri dhe administratë. Ndryshime që, në fakt, nuk do të duhej të befasonin askënd: vetë kryeministri i ka paralajmëruar në dy mbledhjet e fundit të Asamblesë së Partisë Socialiste, ku pakënaqësia e tij me performancën e ministrave dhe administratës nuk është fshehur.
Por kësaj here pakënaqësisë për punën duket se i është shtuar edhe zemërimi politik. Rama nuk e ka pritur mirë “tolerancën” me të cilën një pjesë e administratës iu bashkua, në ditët e para, protestës së flamujve. Dhe tani, ndërsa gushti politikisht duket i qetë, në administratë po përgatitet një furtunë e re.
Pa hyrë në spekulimet për emrat e ministrave që mund të ndryshohen, një gjë duket më e sigurt: Kryeministria u ka kërkuar Ministrisë së Brendshme, Ministrisë së Financave dhe Ministrisë së Mbrojtjes të përgatiten për një valë të madhe dorëheqjesh të drejtuesve kryesorë.
Lajmi nuk është më sekret. Në korridoret e këtyre ministrive kanë nisur prej ditësh pëshpëritjet për valën që pritet të prekë drejtorët, por që askush nuk është i sigurt se do të ndalet vetëm tek ata. Sepse bashkë me emrat e drejtuesve të administratës qarkullon edhe pyetja që në PS prodhon gjithmonë më shumë ankth se çdo reformë: po ministrat?
Nga Dhërmiu, ku ndodhet me pushime, Edi Rama duket se nuk ka bërë vetëm plazh. Me mënyrën e tij të njohur, kryeministri është kujdesur që vartësit të mos ndihen po aq “relax” sa mund të sugjerojë kalendari i gushtit. Aq më tepër në një muaj kur zyrat e rëndësishme të shtetit duket se kanë qenë më të freskëta nga kondicionerët aktivë sesa nga aktiviteti i atyre që duhet t’i popullojnë.
Ndoshta nuk është rastësi që disa prej ministrave të tij janë shfaqur papritur shumë aktivë në rrjetet sociale. Takime, inspektime, njoftime, fotografi dhe prova publike pune në vapën e gushtit. Një lloj dëshmie dixhitale për t’i mbushur mendjen shefit të madh se ata janë aty, vigjilentë dhe të gatshëm të punojnë fort edhe kur të tjerët pushojnë.
Vështirë, megjithatë, që Edi Rama të bindet nga Instagrami.
Po aq e vështirë është të merret seriozisht çdo emër ministri që qarkullon këto ditë si i larguar apo i emëruar. Në këtë pikë, çdo listë është më së paku spekulim. Rama di ta mbajë sekret për vete vendimin deri në momentin e fundit dhe, mbi të gjitha, di ta shijojë shpalljen e ndryshimeve live, gjatë transmetimit televiziv të Asamblesë.
Është një nga ritualet e tij të preferuara politike.
Emrat lexohen njëri pas tjetrit, kamerat janë ndezur dhe salla pret. Ndërsa Rama njofton se kush ngrihet dhe kush bie, ka edhe luksin të shohë dhe të gjykojë mimikat e ushtrisë së servilëve që presin të dëgjojnë emrin e tyre për ndonjë emërim të mundshëm.
Deri atëherë, ministrat mund të vazhdojnë të postojnë, drejtorët të presin dhe korridoret e ministrive të gumëzhijnë.
Sepse këtë gusht, duket se pushimet më të qeta po i bën pikërisht ai që po ua prish qetësinë të gjithëve të tjerëve.
