Ethet e ndryshimeve në qeveri kanë përfshirë jo vetëm ministrat dhe emrat që përfliten si kandidatë për poste, por edhe administratën, ku prej ditësh qarkullojnë skenarë për lëvizje të rëndësishme.
Në këtë situatë, pyetja nuk është më nëse kryeministri Edi Rama do të ndërhyjë në kabinet, por cilët ministra do të vazhdojnë dhe cilët do të largohen.
Përpara 5 shtatorit, datë kur pritet të mblidhet Asambleja e Partisë Socialiste dhe ku mund të konkretizohen ndryshimet, Rama do të mbledhë këtë fundjavë kabinetin qeveritar në Pogradec.
Takimi është konceptuar në formën e një “retreat”-i, ku ministrat pritet të raportojnë për punën e kryer dhe objektivat e secilit dikaster. Por mbledhja vjen në një moment kur një pjesë e kabinetit është nën presion për shkak të pakënaqësive të kryeministrit me performancën e qeverisë dhe administratës.
Për këtë arsye, Pogradeci pritet të jetë edhe një lloj prove e fundit për disa prej ministrave përpara vendimeve që mund të merren një javë më vonë.
Sipas burimeve brenda kabinetit ndër dikasteret më të ekspozuara ndaj ndryshimeve janë Ministria e Brendshme, Ministria e Bujqësisë dhe ajo e Mjedisit.
Në diskutim mbetet edhe pozicioni i ministres së Shëndetësisë, Evis Sala. Ditët e fundit në media është raportuar se ajo i ka paraqitur kryeministrit dorëheqjen, megjithëse deri tani nuk ka një konfirmim zyrtar për largimin e saj.
Megjithatë, sipas zërave që qarkullojnë në mazhorancë, një largim i mundshëm i Salës nga qeveria nuk do të nënkuptonte domosdoshmërisht daljen e saj nga strukturat drejtuese të shëndetësisë.
Për shkak edhe të marrëdhënieve të hershme të Ramës me familjen e saj, flitet se Sala mund të marrë drejtimin e një institucioni të rëndësishëm shëndetësor, me gjasë të një strukture të lidhur me trajtimin dhe kërkimin në fushën e tumoreve, institucion të cilin vetë ministrja e prezantoi vetëm pak ditë më parë.
Gjithsesi, deri tani bëhet fjalë për informacione dhe diskutime që qarkullojnë brenda kabinetit dhe administratës. Lista përfundimtare e ministrave që mund të largohen apo emrat që mund t’i zëvendësojnë mbeten në dorën e kryeministrit.
Vëmendja tashmë është përqendruar te 5 shtatori, kur pritet mbledhja e Asamblesë së Partisë Socialiste.
Nëse ndryshimet konfirmohen, ajo mbledhje mund të shënojë riformatimin e parë të rëndësishëm të kabinetit në mandatin e katërt të socialistëve.
Deri atëherë, disa prej ministrave do të udhëtojnë drejt Pogradecit për të raportuar mbi punën e bërë, pa e ditur me siguri nëse raportin e radhës do ta paraqesin ende nga e njëjta zyrë.
