Kreu i Partisë Demokratike, Sali Berisha i konsideron zgjedhjet e 11 majit si farse, duke theksuar se nuk i njeh ato. Por i pyetur nëse do të jetë në parlament me 50 mandatet e marra, kryedemokrati tha se këtë do të vendosin forumet e partisë.
Pyetje: Ju keni thënë që nuk do votoni asnjë ligj, përveç atyre në parlament! Ju do të jeni në parlament për të marrë 50 mandatet apo keni skenar tjetër?
Berisha: “Të gjitha do vendosen nga forumet, por unë në modelin ose në presupozimin e pjesëmarrjes në parlament deklarova që ne votojmë vetëm ato ligje që kanë të bëjnë me integrimin e Shqipërisë në BE. Atë nuk e vendos unë, por forumet. Këto nuk janë zgjedhje, por farse elektorale“.
Berisha u shpreh i vendosur se do luftojnë vetëm për qeveri teknik për zgjedhje të lira dhe të ndershme.
“Kërkojmë zgjedhje të parakohshme dhe vetëm të parakohshme. Kërkojmë qeveri teknike me agjendë të përcaktuar, problemet që lidhen me procesin e integrimit dhe zgjedhje të lira e të ndershme. Kjo është kërkesa jonë, për të cilën do të luftojmë me të gjithë mbështetësit tanë dhe me miqtë tanë në Europë dhe botë”, tha Berisha. /korrieri
