Ervis Çela, ish-rezident në Paraguaj, rezulton të jetë furnizuesi kryesor me kokainë i organizatës kriminale të drejtuar nga Franc Çopja, ky i fundit kreu i organizatës Çopja, si dhe për eksponentë të tjerë, sikurse është Fadil Balla, president i klubit sportiv Erzeni dhe pronar i kompleksit Ajman Park.
Grupi kriminal u godit nga SPAK, pasi nga hetimet rezultoi se ata kanë trafikuar 16 ton kokainë nga Amerika e Jugut drejt porteve të vendeve të BE-së, ndërsa kanë transferuar miliona euro dhe dollarë drejt Shqipërisë, Paraguajit, por edhe vendeve të tjera.
Në një nga bisedat mes Ervis Çelës, që konsiderohet si grosist kokaine, dhe vëllait të tij Ardjanit, që jeton në Paraguaj, flitet për një vendim për të ndërprerë furnizimin me kokainë të Fadil Ballës, pasi ai u kishte borxh mbi 7 milionë euro. Ndërsa për Franc Çopjën, shprehet se ka shlyer çdo detyrim.
Pjesë nga dosja
Më datë 15 tetor 2020, në orën 01:57:25, Ervis Çela komunikon me vëllain e tij që jeton në Paraguaj, Ardjan Çela, me të cilin kryen një bisedë që lidhet me përfitimet financiare nga trafikimi i lëndëve narkotike. Ervisi e vë në dijeni Ardjanin se shtetasi Franc Çopja Gërgely do të dorëzojë në Shqipëri një shumë, e cila dyshohet të jetë 1 milion euro. Sipas Ervisit, Franci jo vetëm ka shlyer të gjitha detyrimet, por ka kredituar një shumë prej 2 milionë dollarësh.
Ervisi e informon gjithashtu vëllanë e tij në lidhje me shtetasin Fadil Balla, të cilit i referohet me emrin Jul (emri i mëparshëm i Fadil Ballës), se ky i fundit ka akumuluar një detyrim financiar shumë të lartë që arrin vlerën prej 7 milionë e 373 mijë eurosh. Kjo shumë dyshohet se lidhet drejtpërdrejt me trafikimin e lëndës narkotike. Nisur nga ky detyrim financiar i Fadil Ballës, Ervisi është shumë pranë vendimit për të mos e furnizuar më me lëndë narkotike.
Gjatë bisedës, Ervisi e pyet vëllain e tij nëse shuma prej 20 milionë, e cila dyshohet të jetë në monedhën dollar, është e mjaftueshme për t’u administruar në Paraguaj.
“Me kismet fundjavës t’i kaloj 1 milion në Shqipëri. I ka paguar krejt, ka 2 milionë plus këtej, por çon lekë është në Shqipëri,” shkruan Ervis Çela, i cili është nën akuzë bashkë me tre vëllezërit, ku vetëm njëri mbetet në kërkim, dy janë në burg, ndërsa vëllai i katërt ndodhet në arrest shtëpie. Fadil Balla, ndërkohë, ndodhet në arrati. Nga 14 anëtarë të grupit, 10 janë të arrestuar në Shqipëri apo ndodhen në burg në Belgjikë.
