Komisioneri Shtetëror i Zgjedhjeve, Ilirjan Celibashi, ka hapur një tender për përdorimin e Inteligjencës Artificiale (AI) në procesin e numërimit të votave, duke ndjekur shembullin e kryeministrit Edi Rama, i cili prezantoi kohët e fundit “ministren dixhitale” Diella.
Tenderi, me një fond limit prej 17.4 milionë lekësh (rreth 180 mijë euro), ka për qëllim mirëmbajtjen e moduleve ekzistuese dhe ofrimin e një shërbimi asistence me AI (chatbot) për zgjedhjet e pjesshme vendore që do të zhvillohen më 9 nëntor në Vlorë, Berat, Cërrik, Mat dhe Tepelenë.
Sipas burimeve zyrtare, sistemi do të përdoret në mënyrë eksperimentale, për të testuar teknologjinë dhe për të ofruar asistencë në proceset e informacionit zgjedhor.
Sipas dokumenteve të tenderit, procedura do të zhvillohet me negocim pa shpallje publike, një praktikë që ngre pikëpyetje për transparencën dhe konkurrencën e procesit, pasi nënkupton që fituesi mund të jetë i paracaktuar. Në specifikimet teknike kërkohen edhe kamera sigurie të specializuara që do të mundësojnë numërimin dixhital të fletëve të votimit.
Celibashi e ka përshkruar nismën si një testim pilot, i cili nuk do të zëvendësojë ende numërimin tradicional të votave, por do të ndihmojë në përmirësimin e shpejtësisë dhe efikasitetit të procesit zgjedhor.
“Kemi filluar në versionin eksperimental të përdorimit të Inteligjencës Artificiale për kërkimin dhe marrjen e informacioneve zgjedhore nëpërmjet faqes së internetit të KQZ-së, si dhe për të krijuar lehtësira për administratën dhe subjektet zgjedhore,” – tha Celibashi.
Ai sqaroi se projekti do të financohet pjesërisht nga donatorët ndërkombëtarë, dhe se për momentin AI do të përdoret vetëm për analizë dhe asistencë teknike, jo për vendimmarrje ose certifikim rezultatesh.
Megjithatë, tenderi ka hapur debat mbi mënyrën e zhvillimit të procedurës dhe mbi përdorimin e teknologjisë në zgjedhje pa një kuadër të plotë ligjor, duke rikthyer në qendër të vëmendjes diskutimin mbi transparencën dhe sigurinë e proceseve zgjedhore në Shqipëri. /korrieri
