Asambleja e Përgjithshme e OKB-së miratoi të premten, me një shumicë dërrmuese prej 151 votash pro, rinovimin e mandatit të Agjencisë së Kombeve të Bashkuara për Ndihmë dhe Punë për Refugjatët Palestinë (UNRWA) deri në vitin 2029. Pavarësisht situatës së rëndë humanitare në territoret palestineze, Shqipëria zgjodhi sërish të abstenojë, duke mos iu bashkuar vendeve që mbështetën hapur agjencinë kryesore të ndihmës për popullsinë palestineze.
Përveç Shqipërisë, 13 shtete të tjera abstenuan, ndërsa vetëm 10 votuan kundër. Vendimi i Tiranës për të mos dhënë votë pro vjen në një moment kur komuniteti ndërkombëtar ka rritur presionin për mbrojtjen e civilëve palestinezë, ndërsa UNRWA përballet me kufizime të rënda në terren.
Rinovimi i mandatit ndodh teksa Izraeli ka bllokuar aktivitetet e UNRWA-s në territoret palestineze. Në tetor 2024, parlamenti izraelit miratoi ligje që ndalojnë funksionimin e agjencisë në Izrael, përfshirë Kudsin Lindor dhe zonat e pushtuara. Ky veprim është dënuar nga organizatat ndërkombëtare dhe një sërë shtetesh, të cilat e konsiderojnë ndalimin si shkelje të ligjit ndërkombëtar dhe si rrezik të madh për miliona refugjatë palestinezë që varen nga shërbimet e UNRWA-s.
Në këtë kontekst, abstinimi i Shqipërisë është turpi i radhës për pozicionimin dhe koherencën e politikës së jashtme shqiptare, veçanërisht kur bëhet fjalë për çështje humanitare ku shumica dërrmuese e vendeve ka marrë një qëndrim të qartë mbështetës.
