32-vjeçari nga Shkodra, Eduard Kësolla, është ndjekur dhe kapur në zonën e “Freskut” në Tiranë, teksa përpiqej prej tre muajsh t’i shpëtonte ndalimit pasi tentoi pas një sherri të vriste me armë zjarri një 21-vjeçar.
Aksioni u finalizua nga Drejtoria e Forcës së Posaçme Operacionale një tjetër fazë e operacionit kombëtar, të koduar “Operacionalja”, teksa i riu cilësohej person me rrezikshmëri të lartë.
Efektivë të armatosur e rrethuan mjetin me të cilin udhëtonte i dyshuari dhe e shtrinë përtokë me armët drejtuar, duke e prangosur.
Gjithashtu u arrestua shoku i tij 27-vjeçar që po e transportonte me makinë, tip “Audi”, e cila u sekuestrua.
“Si rezultat i administrimit të shpejtë të informacionit të siguruar në bashkëpunim me Prokurorinë e Shkodrës mbi vendndodhjen e një shtetasi me precedent për krime kundër personit dhe armëmbajtje pa leje, si dhe i veprimeve operacionale të kryera nga shërbimet e Drejtorisë së Forcës së Posaçme Operacionale në Drejtorinë e Përgjithshme të Policisë së Shtetit, gjatë operacionit të koduar “Operacionalja 89”, u ndalua në Tiranë shtetasi E. K., 32 vjeç, banues në fshatin Grudë e Re, Shkodër.
Prokuroria e Shkodrës kishte lëshuar urdhër për ndalimin e tij, për veprat penale “Vrasja në rrethana të tjera cilësuese”, mbetur në tentativë, “Prishja e qetësisë publike” dhe “Mbajtja pa leje dhe prodhimi i armëve, armëve shpërthyese dhe i municionit”.
32-vjeçari akuzohet se më datë 16.01.2026, në zonën e quajtur “Kryqëzimi i Vinotekës”, Shkodër, gjatë një konflikti për motive të dobëta, ka tentuar të vrasë me armë zjarri shtetasin A. M., 21 vjeç.
Po gjatë operacionit u arrestua dhe shtetasi E. K., 27 vjeç, banues në fshatin Grudë e Re, Shkodër.
27-vjeçari u arrestua për veprën penale “Përkrahja e autorit të krimit”, pasi drejtonte automjetin me të cilin lëvizte në zonën e “Freskut” Tiranë, 32-vjeçari që ishte në kërkim.”-njofton policia.
Materialet procedurale i kaluan Prokurorisë, për veprime të mëtejshme.
