Kryetari i Bashkisë së Tiranës, Erion Veliaj, ka ankimuar në Gjykatën Administrative të Apelit vendimin që refuzoi shqyrtimin në themel të padisë së tij kundër prokurorit të SPAK, Ols Dado.
Në një deklaratë të shpërndarë në emër të Veliajt dhe Bashkisë Tiranë, konfirmohet se kryebashkiaku kërkon që Apeli të shqyrtojë pretendimet e tij për pavlefshmërinë e dekretit të emërimit të Dados si prokuror në vitin 2008.
Veliaj ndodhet në paraburgim që prej shkurtit 2025, nën hetim nga SPAK për akuza që lidhen me korrupsionin dhe pastrimin e parave, ndërsa Ols Dado është një prej prokurorëve që ka hetuar çështjen ndaj tij.
Gjykata Administrative e Shkallës së Parë e rrëzoi më herët padinë pa hyrë në themelin e pretendimeve, duke vlerësuar se Veliaj nuk kishte legjitimim aktiv dhe interes të drejtpërdrejtë ligjor për të kundërshtuar dekretin e emërimit të prokurorit.
Veliaj kundërshton këtë arsyetim dhe pretendon se gjykata ka shmangur verifikimin e ligjshmërisë së emërimit të Dados.
Sipas qëndrimit të tij, Ols Dado nuk kishte përfunduar Shkollën e Magjistraturës dhe ishte emëruar prokuror pasi ushtronte profesionin e noterit, pa plotësuar, sipas Veliajt, kushtet ligjore përjashtimore që kërkoheshin në atë kohë.
“Thelbi i çështjes është i thjeshtë: a mund të ushtrojë pushtetin penal të shtetit një person që pretendohet se është emëruar në kundërshtim me kriteret urdhëruese të ligjit?”, thuhet në deklaratë.
Mbrojtja e kryebashkiakut pretendon se bëhet fjalë për një rast të mundshëm “pavlefshmërie absolute” të aktit të emërimit, e cila, sipas saj, mund të konstatohet nga gjykata pavarësisht kohës që ka kaluar.
Veliaj e lidh gjithashtu çështjen me hetimin penal ndaj tij, duke argumentuar se një prokuror që ka ushtruar pushtetin penal ndaj një personi duhet të mund t’i nënshtrohet kontrollit gjyqësor lidhur me ligjshmërinë e statusit dhe kompetencave të tij.
Padia fillestare u depozitua në janar 2026 kundër Presidentit të Republikës për periudhën kur ishte nxjerrë dekreti, Këshillit të Lartë të Prokurorisë dhe Ols Dados, me kërkesën për shfuqizimin e aktit të emërimit të vitit 2008.
Tashmë çështja kalon në Gjykatën Administrative të Apelit, ku Veliaj kërkon rrëzimin e vendimit të Shkallës së Parë dhe hapjen e shqyrtimit në themel të pretendimeve për ligjshmërinë e emërimit të prokurorit të SPAK.
