Kryeministri i Maqedonisë së Veriut, Hristijan Mickoski, ka zhvilluar këtë të enjte një vizitë në Pustec, ku mori pjesë në Festivalin Folklorik Maqedonas “Prespa”. Aktiviteti është shoqëruar me polemika, pasi gjatë ceremonisë u ekzekutua himni i Maqedonisë së Veriut, por jo Himni Kombëtar i Shqipërisë.
Rasti është konfirmuar nga disa media shqiptare që ndoqën aktivitetin dhe shënon herën e dytë brenda pak muajsh që gjatë një aktiviteti me pjesëmarrjen e Mickoskit në territorin e Bashkisë Pustec ndodh e njëjta situatë.
Në maj të këtij viti, gjatë vizitës së kryeministrit maqedonas në Kallamas të Pustecit, për inaugurimin e një monumenti kushtuar të rënëve maqedonas të Luftës së Dytë Botërore, u raportua gjithashtu se në ceremoni ishte ekzekutuar vetëm himni maqedonas dhe jo ai shqiptar.
Episodi i kësaj të enjteje merr një tjetër peshë për faktin se Mickoski ishte vetë patron i Festivalit “Prespa”. Mediat maqedonase kishin njoftuar që më 4 gusht se festivali do të zhvillohej në sheshin “Goce Delçev” në Pustec, nën patronazhin e kryeministrit Hristijan Mickoski.
Pas polemikave ka reaguar kryetari i Bashkisë Pustec, Pali Kolefski, i cili ka kërkuar ndjesë dhe ka deklaruar se kishte kërkuar paraprakisht nga organizatorët që krahas himnit maqedonas të ekzekutohej patjetër edhe himni shqiptar.
Kolefski tha se, pasi kishte marrë programin e aktivitetit dhe ishte informuar se ceremonia do të hapej me himnin maqedonas, kishte kërkuar përfshirjen edhe të himnit shqiptar.
Sipas tij, Bashkia e Pustecit nuk ishte organizatore e festivalit, por e ftuar. Megjithatë, pikërisht kjo pjesë e deklaratës së kryebashkiakut bie ndesh me informacionin e publikuar më herët në mediat maqedonase.
MKD.mk, duke njoftuar festivalin më 4 gusht, shkruante se aktiviteti organizohej nga Shoqata Maqedonase “Prespa”, shoqata “VMRO-DPMNE Albania” dhe Bashkia Pustec, ndërsa Mickoski ishte patron i tij.
Në aktivitet ishte i pranishëm edhe ish-kryetari i Bashkisë Pustec, Edmond Themelko, i raportuar gjithashtu si një prej personave të përfshirë në organizimin e aktivitetit.
Ngjarja e sotme përsërit kështu precedentin e majit: në territorin e Republikës së Shqipërisë, në një aktivitet ku merr pjesë kryeministri i një shteti tjetër, ekzekutohet himni i vendit të tij, ndërsa mungon ai shqiptar.
Këtë herë, vetë kryebashkiaku i Pustecit pranon se kishte kërkuar që himni shqiptar të ishte pjesë e ceremonisë dhe ka kërkuar publikisht ndjesë për faktin që kjo nuk ndodhi.
