Më shumë se 100 telefonata, qindra mesazhe dhe komunikime përmes videocall-eve, fotove dhe videove mes drejtueses së SHISH-it, Vlora Hyseni, dhe Ergys Agasit janë pjesë e hetimit të SPAK, të cilat ngrenë pikëpyetje jo vetëm mbi funksionimin e institucionit, por edhe mbi sigurinë kombëtare në vend.
Sipas të dhënave të rrjedhura, që i referohen vendimit të Gjykatës së Posaçme për caktimin e masës së arrestit në shtëpi ndaj kreut të Shërbimit Informativ, komunikimet janë zhvilluar nga 28 qershori deri më 26 gusht, ditën kur Agasi u arrestua në Durrës, pas disa muajsh në kërkim në kuadër të hetimit për dosjen e AKSHI-t.
Materialet e hetimit flasin për një numër më të detajuar prej 508 formash komunikimi në aplikacionin Signal, duke përfshirë thirrje, komunikime zanore, video dhe mesazhe në kohën kur Agasi ishte person në kërkim.
Biznesmeni kontrovers Ergys Agasi është nën hetim për disa vepra penale që kanë të bëjnë me “grup të strukturuar kriminal”, “korrupsion aktiv”, “pastrim parash”, “konkurrencë të paligjshme”, “heqje të paligjshme të lirisë” dhe “shkelje të barazisë së pjesëmarrësve në tendera”.
Për hetuesit, përmbajtja dhe shpeshtësia e komunikimeve ngrenë pikëpyetje mbi natyrën e marrëdhënies mes tyre, ndërsa Hyseni ka pranuar se ka komunikuar me Agasin.
Versioni i saj, sipas deklarimeve nga materialet e rrjedhura, është se ai ishte bashkëpunëtor i SHISH-it dhe se komunikimet kishin karakter profesional.
Ajo ka mohuar gjithashtu se e ka takuar fizikisht gjatë kohës kur Agasi ishte në kërkim.
Dosja përmban gjithashtu komunikime ku përmenden takime me zyrtarë të lartë. Teksti i rrjedhur në media sugjeron edhe emrin e kryeministrit të vendit.
Në një prej tyre Hyseni shkruan: “Nesër duhet ta takoj KM në 8.30” dhe më pas drejtuesja e SHISH-it informon Agasin edhe për një tjetër. Ajo njofton për një takim urgjent me përfaqësues sauditë dhe për kthimin e saj në Kosovë.
Në komunikime përmendet edhe Skënder Hita, i cili në atë periudhë ishte drejtor i Përgjithshëm i Policisë.
“Skënderi më thirri me u taku të hënën… Të shpresojmë që e ka porosit Kryeministri”, thuhet në një prej mesazheve.
Në biseda shfaqen gjithashtu emrat e Taulant Ballës dhe Belinda Ballukut.
Drejtuesja e Shërbimit Informativ të Shtetit, Vlora Hyseni, po hetohet nga SPAK për “përkrahje të autorit të krimit” dhe “zbulim të akteve ose të dhënave sekrete”, në kuadër të hetimit që lidhet me Ergys Agasin.
Më 21 shtator, Gjykata e Posaçme caktoi ndaj Hysenit masën “arrest në shtëpi” dhe pezullimin nga detyra. Menjëherë pas daljes së vendimit të Gjykatës së Posaçme, kryeministri Edi Rama tha se çdo dyshim ndaj Hysenit duhet të hetohet dhe të zbardhet përmes një procesi të pavarur gjyqësor, ndërsa njoftoi largimin e saj nga drejtimi i SHISH-it.
Rama tha se përgjegjësia është individuale dhe se qeveria nuk duhet të ndërhyjë në çështjet që i përkasin drejtësisë. Nga opozita kanë ardhur reagime më të ashpra.
Kreu i Partisë Demokratike, Sali Berisha, e ka lidhur çështjen me akuza që, sipas tij, i kishte ngritur më herët për marrëdhëniet mes Hysenit dhe Agasit, ndërsa ka bërë pretendime për kontakte të shpeshta mes tyre. Këto janë deklarime politike dhe nuk përbëjnë konstatime gjyqësore.
Në të njëjtën kohë, zhvillimet kanë hapur debat publik mbi sigurinë e informacionit shtetëror dhe funksionimin e institucioneve të sigurisë, ndërsa hetimi i SPAK vijon. /shteg.org
