Dritan Rexhepi u ekstradua nga Turqia në Shqipëri. I shumëkërkuari aktualisht ka mbërritur në aeroportin e Rinasit, teksa po kryhen veprimet procedurale.
Më pas, pritet që Rexhepi të transferohet në burgun 313.
Sipas informacioneve që sapo kemi marrë, bëhet me dije se Dritan Rexhepi sapo është ulur në aeroportin e Rinasit dhe po kryhen veprimet procedurale. Menjëherë, pas procedurave, pritet që nën masa të rrepta sigurie, Dritan Rexhepi të niset për në burgun 313./
Kush është Dritan Rexhepi, bosi shqiptar i kartelit të drogës?
Dritan Rexhepi, i arrestuar në Stamboll për llogari të drejtësisë shqiptare dhe asaj italiane, ka një sërë dënimesh dhe akuzash të ngritura në drejtim të tij.
Ai është dënuar me 25 vite burg nga Gjykata e Krimeve të Rënda për vrasjen e dy personave me armë zjarri më 6 janar të vitit 1999. Por edhe pse kishte një dënim në ngarkim të tij, ai ishte në listën e më të kërkuarve nga drejtësia shqiptare.
Rexhepi gjithashtu akuzohet si organizator dhe porositës i pengmarrjes së Jang Prengës (i cili më pas ndërroi jetë), pasi vëllai i tij, i cili ishte i përfshirë në trafikun e lëndëve narkotike, nuk kishte dorëzuar një sasi prej 260 kilogramësh kokainë.
Në vitin 2020, Interpoli botoi disa fotografi të Rexhepit, nga brenda burgut në Ekuador, ku vuante një dënim për trafikim të lëndëve narkotike. Rexhepi dyshohet se është drejtuesi i rrjetit të trafikut të kokainës drejt Europës, rrjet i shkatërruar në vitin 2020 nga një operacion i Europol, ku u përfshi ndër të tjera edhe Policia e Shtetit. Ai është arrestuar në vitin 2014 me 240 kg kokainë në Ekuador, por dyshohet se drejtonte nga qelia operacionet e trafikut të kokainës./korrieri
